پاکستان کرکټ، افغانستان زړونه وګټل

په لوبه کې ګټل او بایلل وي خو زمونږ اتلانو نن یوه په زړه پورې لوبه نندارې ته وړاندې کړه، او په سختې مقابلې سره يې یو ځل بیا دنړیوالو مبصرینو او د کرکټ مینه والو پام ځان ته راواړوو، ننۍ لوبه د آسیا جام یواځینۍ لوبه وه چې یو طرفه نه وه او تر وروستیو شیبو پورې دا سخته وه چې د لوبې د ګټونکي اړخ په اټکل وشي.

اتلانو مه خفه کیږۍ تاسې زمونږ اتلان یاست، یوازې تاسې یاست چې په تیرو ۱۷ کلونو کې مو د هیوادوالو په شونډو موسکا راوستي، د هیواد درې رنګه بیرغ او ملي سرود مو د نړۍ په هر ګوټ کې په نړیوالو وپیژاند او هیواد ته مو ویاړونه وګټل، بیا مو هم په هر ډګر کې سرلوړي او بریالي غواړو.

د ننۍ لوبې د بایللو یو ستر لامل د آی سي سي له خوا د لوبو په تقسیم اوقات کې لویه تیروتنه او د افغانستان او بنګلادیش لوبډلو ته د پرلپسې لوبو ټاکل وو، چې د افغان لوبغاړو په څیرو کې د پرونۍ لوبې ستړیا په ښکاره ډول محسوسیدله.

او له بل اړخه ۱۷ اضافي منډې، د خطاء توپ نیونې له امله د څلوریزو ترسره کیدل او د رن اوټ چانسونه له لاسه ورکول او د ویکټ ساتونکې سستي هغه ستونزې وي چې له امله یې مونږ نن لوبه وبایلله.

د توپ وهنې په برخه کې حشمت الله شهیدي ۹۷  اصغر ۶۷ او رحمت شاه ۳۶ ښې منډې جوړې کړې او پاکستانۍ لوبډلې ته يې یو ښه هدف ۲۵۸ وټاکه خو په خواشینۍ سره نن مو د توپ اچونې او توپ نیونې په برخه کې ډیرې ستونزې درلودې.

په لنډه توګه ویلای شو چې نن د پاکستان لوبډلې لوبه نده ګټلې بلکه مونږ وبایلله ځکه ۲۵۸ داسې هدف ندې چې د افغانستان ټیم توپ اچونکې ترې ساتنه ونشي کړای.

د ټیم له روزونکې او د بورډ له مسئولینو څخه مو هیله ده چې د ټيم نیمګړتیاوې په نښه او د پوره کولو لپاره یې اقدام وکړي ځکه دا داسې نیمګړتیاوې ندي چې مونږ یې بدیلونه او حللارې ونلرو.

په اوس وخت د افغانستان ټيم یوه لویه نیمګړتیا د تیز توپ اچوونکو کمښت دې، د نړۍ یوې لوبډلې هم په یوه تیز توپ اچونکې تکیه نده کړې، هره لوبډله له ځان سره ۲ یا درې تیز توپ اچونکې حتمن لري، په افغان لوبډله کې ټول مسئولیت په شمار ۵ ټوپ اچونکو ته ورترغاړې دي. مونږ باید په لوبډله کې ۱ یا ۲ اضافي توپ اچونکې ولرو تر څو د یو توپ اچونکې په خرابیدو له بل ګټه واخلو، چې ښه بیلګه یې په پرونۍ لوبه کې د بنګلادیش لوبډله وه چې د افغانستان په وړاندې یې ۸ توپ اچونکي ولوبول.

بله لویه ستونزه چې د افغانستان لوبډله ورسره له ډیره وخته مخ دې د پیلونکو لوبغاړو کمزوري ده، چې باید له ځوانو لوپغاړو څخه تکړه لوبغاړې غوره شي او په دې برخه کې وروزل شي.

شهزاد زمونږ اتل او د سترګو تور دې خو اوس د ویکټ ساتنې او هم د توپ وهنې په برخه کې ښه نه ځليږي نو باید بدیل باندې یې فکر وشي.

د توپ وهونکو د راوتلو پرځایونو باید له غور وشي چې کوم توپ وهونکې په کوم ځای کې ښه ځلیږی هلته ورته موقع ورکړل شي.

 بیاهم نن افغان اتلانو ښه لوبه وکړه، زیار یې وویست او تر خپلې وسې یې د هیوادوالو د خوښۍ او د خپل هیواد د نوم ګټلو لپاره خواري وکړه او د پاکستان غوندې قوي لوبډلې سره چې په نړیواله درجه بندۍ کې په یو ورځنیو لوبو کې ۵ او په ۲۰ اوریزه لوبو کې لومړې مقام لري سخته مقابله وکړه او په ډیر لږ څه کې یې وبایلله مونږ ډاډه یو چې زمونږ اتلان به یوه ورځ د نړۍ د قوي لوبډلو په سرکې راضي او نورې ډیرې خوښۍ به هیوادالو ته ډالۍ کوي.