طالبان پاکستان سره “د ورور هېواد په څیر” اړیکې غواړي

طالبانو ډان ورځپاڼې ته:

پاکستانۍ ډان ورځپاڼې د طالبانو د ویاند ذبیح الله مجاهد له قوله خبر ورکړی دی چې طالبان به د سولې په صورت کې حکومت ته له رسېدو سره سم پاکستان ورور هېواد وپېژني. سرچینه کاږي، مجاهد ویلي چې له یاد هېواد سره به هم هغه ډول اړیکې ورغوي لکه له نورو ګاونډیو هېوادونو سره او دا اړیکې باید په دوه اړخیز درناوي ولاړې وي. سرچینې د مجاهد له خولې ویلي، مجاهدینو هم د شوروي د یرغل په وخت کې له پاکستان سره ښې اړیکې درلودې او دوی لپاره پاکستان تر ټولو امن ځای وو نو دا هېواد د افغانانو دویم کور دی او دوی هم ورته په همدې سترګه ګوري. هغه له امریکایي لوري سره خبرو ته په اشارې ویلي چې طالبانو په ۲۰۰۱ میلادي کال کې امریکا ته د خبرو وړاندیز کړی وو خو هغوی ونه منل او ورپسې په ۲۰۱۳ کال کې هم قطر کې د سیاسي دفتر د پرانیستلو پر مهال امریکا ته ورته وړاندیز وشو اما دا وړاندیز هم ونه منل شو خو په دې وروستیو کې امریکا خپله د دوی خبرې ته راغلې او خبرې یې پیل کړې دي. هغه ویلي، تر اوسه د دې خبرو د پایلو په اړه څه نه شي ویلی خو وخت به هر څه ثابت کړي. مجاهد زیاته کړې، دوی د هیچا په خوښه هم جګړه نه کوي بلکې د روانې جګړې موخه پر افغانستان د امریکایي یرغل پای ته رسول دي. هغه دغه راز د واک د ویش په اړه ویلي که څه هم اوس په دې اړه خبرې له وخته مخکې دي خو دوی د سولې په صورت کې د داسې نظام پلوي دي چې د ټولو قومونو انډول پکې مراعات شي.