د ټاکنو د سبوتاژ کولو ناوړه هڅې

محمدبشیر یوسفزوی/

چې كله هم ستر څښتن پر افغان ولس كومه هستي لورولې ده، نو كورنيو او بهرنيو دښمنانو په ټوله دوه رنګۍ، بې رنګۍ، مكر، چل او فرېب د هغه د تخريبولو پسې خپلې ناولې خولې او ژبې پرانيستې دي. د هغه په وړاندې يې د ولس بې باوري ډېره كړې ده. ولس ته يې په يوه بله بڼه ور پېژندلى دى.

افغان سيدجمال الدين او د خپلواكۍ ځلنده ستورى شاه امان الله خان غازي يې څرګندې بېلګې دي. چې د دښمنانو ناوړه تبليغاتو ورته په خپل كور كې د شپې تېرولو چانس كم كړ او همغه وو چې له هر ډول ټكر پرته يواځې د خپلو خلكو د هوساينې لپاره بې مخه ښې ترې نورو هېوادونو ته لاړل.

کورنۍ او بهرنۍ استخباراتي حلقې کوښښ کوي چې د ولسمشر غني د بریا د مخنیوي په موخه ولسمشریزې ټاکنې سبوتاژ کړي، ځکه دوی پوهېږي چې ښاغلی غني به په لږ وخت کې افغانستان د پاکستان، ایران، روسیې، چین او نورو له احتیاجه وباسي، مګر د افغانستان دښمنانو ته دا د منلو او زغم وړ نه ده، ځکه هغوی هیڅ وخت په خپل پښو د ولاړ افغانستان غوښتونکي نه دي او په همدې خاطر له یوې خوا وسله وال طالبان پر ټاکنو او ولسونو د بریدونو ګواښونه کوي، له بل لوري داخلي سیاسي حلقې د ټاکنو پر ضد تبلیغات کوي، مګر ولسمشر غني په ټول قوت د ټاکنو د ترسره کېدو غوښتونکی دی.

خو له نېكه مرغه چې اوس افغان ولس هوښيار شوى دى. اوس دا ولس په ډېره ښه توګه خپل دوست اودښمن درك كولى شي. خپل بادار او خدمتګار پېژني. په دې هم پوهېږي چې څوك يې پرټپونو ملهم لګولى شي؟

خو دهېواد له ځوان كهول څخه زما هيله او غوښتنه همدا ده چې واك ته د دغه ستر انسان په رسولو كې هيڅ ډول  درېغ او لټي ونه كړي. له خپل كور، كلي او سيمې دې پيل كړي. د هېواد د بيا رغونې، د امنيت د ټينګښت، د بېكاري د له منځه وړلو، د زده كړې د كيفيت د ښه كولو او دودولو، د اداري فساد، بډو او نورو ګڼو اوسمهالو بدمرغيو په هكله دې د ښاغلي غني روښانه لارې، كړنلارې، پلانونه چې لري يې ولس ته ورسوي. د ولس ذهنونه دې د هغه په هكله راڼه كړي. دا دې هم ورته ووايي چې ښاغلى غني هغه څوك نه دى چې يواځې په ژمنو پايي. بلكې هغه څه چې وايي كټ مټ يې پلي كوي. ځكه  د ډاكټر غني پلانونه د ده د خپلوتجربو، پوهې او فكر زېږنده دي او دى يې  په پلي كولو پوره برلاسى دى.

سره له دې چې تېرو واكمنو د تشو ژمنو له امله په ولس كې يوه لويه بې باوري رامنځته كړې ده، خو له نېكه مرغه چې ډاكټر غني له هغو ټولو سره د ځمكې او اسمان هومره توپير لري.

ډېر روڼ او روښانه شاليد لري، ان د ده دښمنان هم دا زړه نه شي كولى او نه دومره څه موندلى شي چې د ده پر ضد يې د يوه ثبوت په توګه وړاندې كړي. ډاكټر غني په تېرو پنځو کالو کې هیڅ زورواکي ته نه یوازې سرښکته نه کړ او کومه معامله یې ونه کړه، بلکې زورواکان یې محدود کړل، پر دوی یې کړۍ راتنګه کړه، وسلې یې ورڅخه واخیستې او ځینې یې د زندان د بندو دروازو تر شا واچول.

د غاصبانو د غصب مخه یې ونیوله، فساد یې راکم کړ. مګر د فساد د مخنیوي په برخه کې لا هم جدي هڅې روانې دي. د افغانستان داخلي عواید یې زیات کړل او هیواد یې کرار کرار د پردیو له احتیاجه راوېست.