د عبدالله پلویان عامه اذهان مغشوشوي

په افغانستان کې ټاکنې له یو ناورین څخه کمې نه وي، ځکه چې له یوې خوا خو امنیتي وضعیت ښه نه وي او زموږ خلک د اور په لمبو کې د جمهوریت د ملاتړ او د خپل زعیم د ټاکلو لپاره مرګ په سترګو ویني، مګر بیا هم ورځي او خپلې رایې کاروي، چې دا واقعا که له یوې خوا شهکار دی، له بلې خوا له بده مرغه د ټاکنو پرمهال د امنیتي او دفاعي ځواکونو په ګډون ، د ټاکنیزو کمېسیونونو کارکوونکي او عام ولس او د نوماندانو پلویان په کې خپل ژوند له لاسه ورکوي.

تر دې بل لوی ناورین دادی چې د ټاکنو کمېسیونونه د بې کفایتیو، د مصحلتونو او یا ځینو نورو مواردو په اساس په میاشتو میاشتو په دې نه توانېږي چې د ټاکنو پایلې اعلان کړي، خلک په انتظار کې ساتي او دغه انتظار په خلکو د مرګ غوندې سخت تېرېږي.

په دې منځ کې بیا ځینې کسان د دروغو اوازې خپروي او په دغو اوازو د ولس د اذهانو د مغشوشولو هڅه کوي. لکه له ټاکنو وړاندې چې د عبدالله د پلویانو په ګډون یو شمېر نورو نوماندانو او د حکومت سیاسي مخالفینو اوازې خپرولې او ویل به یې چې ټاکنې نه ترسره کېږي او نه یې هم د ترسره کېدو امکانات موجود دي. دا مهال بیا د ټاکنو له ترسره کېدو وروسته د عبدالله پلویان هره لحظه یوه اوازه خپروي او په دې سره د ولس د اذهانو د مغشوشولو هڅه کوي.

اصولا او قانونا باید نوماندان او د دوی پلویان د ټاکنیزو کمېسیونونو د پایلو اعلان او وروستۍ پرېکړې ته منتظر پاتې شي او تر هغو پورې د ګټلو او بایللو خبرې یادې نه کړي، بله دا چې د ټاکنیزو کمېسیونونو مسوولین هم باید لږ ځانونه وښوروي او خپل کارونه سره چټک کړي، ترڅو نه د اوازو خپرولو زمینه برابره شي او نه هم د عبدالله پلویانو ته دا موقع په لاس ورشي چې دوی د خلکو اذهان مغشوش کړي.

د عبدالله پلویان کله وایي چې دوی د ټاکنو ګټونکي دي، کله بیا وایي چې ټاکنې دویم رونډ ته ځي او هیڅوک هم ګټونکی نه دی، کله وایي چې نورو تقلب کړی او په لکونو رایې باطلې شوې او فیصدي نه پوره کېږي. دا او دېته ورته اوازې د خلکو د تشویش او اندېښنې لامل کېږي او دا که همداسې ادامه ولري، نو په راتلونکي کې په ټاکنو ملي پروسه د خلکو باور کمزوری کوي.