کاڼه غوږونه او د عفريت اوازونه

ځيني خلـک د رهبر او سياستمدار په تفکيک او مـاهيت نه پوهيږي، نو په سياست به يې څه پوه سي؟ دلته هغه خلک سياست کوي، چي سياست نه پيژني، نو سياسيون به څنګه وپيژني؟ په دې وطن کي خياطان او موچيان د سياست غوږونه او مهرې دي، دلته د بطلان ژبي چليږي، هر څوک د حق چيغي وهي، پيريان د عفريت ځوابونه درکوي.

غوږونه کاڼه دي، ژبي د سقوط په طلسم مبتلا دي. نن د وطـن زمريان ويده دي، نن د هيواد غاور شـهيد دی، اوس د نجات راوي خفه دی، تش ميدان دی، اوس د حق پاسبان خاموش دی.

هر څوک د قدرت په نيلي سپور دی، نه پوهېږم چي دا کور اوس د چـا کور دی؟ چـا ګټلی دا هيواد پـه توره يا وچ زور دی؟ او چاته پاته يې سـبا بيا بل پيغور دی؟ څوک اصلي مالک ددې وطن دی؟ څوک راغلی د بل لور دی؟ او بـاالخره مسکين او غريب ملت خو واکمن يې په نس مـوړ دی. په دې خاوره کي هر څوک او هـره څېره مـدار د اعتبار ګرځي. اوس قضاوت هم انقضا لري.

قانون هم جوړېږي او قوت هم موندل کېږي. دلته هرځای محکمه ده، د ښه او بد ټاپې هر ځای لګېږي، هر څوک د قضا پر مسند ناست دی او حکمونه د هـر چـا چـلېږي. نه پوهېږم څه ډول حالت دی؟ څه روان دي او څه تيريږي؟ اوس دلته بې تعليمه معلم دی او عالم ته درس ورکوي.

شاګرد اسـتاد رهبري کوي. تياره رڼا ته لار ښوونه کـوي. بېسواده سـواداره ته هـدايت کوي، ړوند بينا لاري ته برابروي او کوڼ د سامع ترجماني کوي. دلته د مخاطب پر ځای ځـواب بل څوک درکوي، دلته د غايب پرځای حاضري بل يو لاسليکوي او تاته د سوال (در) خپله ځواب نه درکوي.

د وطن سره ظلم روان، د خاوري سره جفا کېږي. اوس د ۲۱ پېړۍ تاريخ ليکل کېږي، حقايق نه کتمانيږي او د وخت جبر نه پټېږي. هره مـعامله ثبتېږي او هره حماسه ستايل کېږي. پـخواني شعارونه به له عمل سره مقايسه کيږي او حق به حق دار ته رسيږي.

وخت به هر څه ثابت کړي، زمان به د حق او باطل مېزان برابر کړي. انسان به د وينا او عمل په توپير پوه سي. عدالت څوک نه شي، محوه کولای، د وخت پرېکړي به بيا انقلاب راولي او هر چا ته به د خپلو آعمالو عمل نامه ورکړي.

دلته د ملت سره هـم سـياست کېږي، دلته د شـخصي نظر سره هم حسادت کېږي، اوس له فرهنګ سره هم عداوت کېږي، آن د ملي منافعو سره لوبي او خيانت کېږي.

که وطن پلورونکي ملت محاکمه نه کړي، د الله (ج) په محاکمه کي به محاکمه شي. هيڅوک هم د ملت د مال هاضمه او معده نه لري. دا ولس به د حساب پر ځای د هر څه حساب کوي او خپل حق به له هرچا څخه اخلي.

دداسي يوې ورځي او صحنې په هيله! چي حق حقدار او کار اهـل کار ته وسپارل شي، نه جګر جنرال ته او دا وطن نور د ټولو مظالمو او بدبختيو څخه خلاص شي.

آمين يارب العالمين