امریکا کې د کرونا ویروس له امله د ۱۳۵ زرو کسانو مړینه اټکل شوې

د  امریکا په پلازمینه واشنګتن کې د سیاتل په پوهنتون کې د مدل جوړولو یوه معتبره موسسه وایي د اګست میاشتې تر څلورمې نیټې پورې به په امریکاکې ۱۳۵ زره کسان د کرونا ویروس له امله مړه شي.

سپینه ماڼۍ تل د دغه موسسې له مډلونو استفاده کوي. دغه موسسې مخکې بله شمېره وړاندې کړې وه ، خو اوس وایي محدودیتونه ژر لیرې شوي او د خلکو تګ راتګ ژر پیل شوی ، نو ځکه یې د مړینې شمېره هم بدله شوې.

د آی اچ آی ام موسسه د واشنګتن د سیاتل ښارپه پوهنتون کې ده چې دوې میاشتې مخکې یې په دې اړه یو بل مدل وړاندې کړی و. د امریکا حکومت په همدې مدل استناده کاوه ، خو پرون یې په خپل مدل کې ځکه بدلون راوستی چې وایي خلکو محدودیتونه مات کړي او ګرځیدل راګرځیدل ډېرشوي دي.

دا موسسه وایي دا چې تر راتلونکو څو ورځو پورې به د امریکا په ۳۱ ایالتونو کې د کرونا ویروس له امله محدودیتونه لغوشي او د خلکو تګ راتګ به هم ډېر شي نو د کویید ۱۹ له امله د مړینې کچه هم لوړیږي.

 دغه موسسې د خپل مدل په وړاندوینه کې ویلي چې تمه کیږي چې تر راتلونکې یوې اونۍ پورې په ۳۱ ایالتونو کې د خلکو ګرځیدل راګرځیدل ډېرشي او هغه واټن چې د خلکو ترمنځ په پام کې نیول شوی و ښایي لږشي، نو خلک به د کرونا ویروس د لیږدولو عامل شي.

د دغه موسسې څرګندونې هم د هغو کارپوهانو سره ورته دي چې ویلي یې و که محدودیتونه ژر لیرې شي ، نو ډیر خلک به په کرونا ویروس اخته شي.

ټرمپ هم د مړینې کچه تر سل زرو پورې پورته کړې ده.