د طالبانو او القاعده اړیکه نه بیلدونکي ده

ملګرو ملتونو د څار ادارې یو ځل بیا راپور ورکړی چې لا هم طالبانو له القاعده او نورو ترهګرو ډلو سره په افغانستان کې رابطه نه ده پرې کړې.

طالبان دا اړیکه ځکه نه شي پرې کولی چې له یوې خوا پرې د هغو بنسټونو مرستې بندیږي چې سخت دریځو ډلو سره یې کوي او له بلې خوا یې جګړه تر سوال لاندې راځي.

طالبان په افغانستان کې جګړه جهاد بولي او د جهاد لپاره بیا طالبان له سرحد سره مخالف دي او هر هغه څوک چې لیکو کې ورسره جګړه کې برخه اخلي، دوی یې ممناعت نه شي کولی.

طالبان مجبور دي چې دوه کاره وکړي

لومړی دا چې د امریکا سره د هوکړې خلاف عمل وکړي، لکه تراوسه یې چې القاعده ډلې سره اړیکې نه دي پرې کړي او په دې موضوع باندې ټوله نړۍ خبره ده.

که دا وضعیت همداسې دوام وکړي او طالبان له القاعده ډلې سره اړیکې پرې نه کړي، نو لیرې نه ده چې امریکا له طالبانو سره شوې هوکړې څخه په شا شي.

دویم دا ، که طالبان چیرې القاعده او نورو ترهګرو ډلو سره قطع روابط کوي نو مجبور دي چې نړۍ ته وایي ، دوی د واک لپاره جګړه کوي او هیڅ ډول جهاد پکې نشته.

طالبانو که دا کار وکړ، نړۍ کې یې د جګړې شرعي مشروعیت نور هم له منځه ځي، لکه اوس چې تللی دی.

ځکه د طالبان قومندانانو سره د القاعده ډله مالي مرستې کوي او حاضر نه دي چې دا مرستې یې له لاسه ووځي.

که سیاسي ډله له امریکا سره هوکړه کوي او له امریکا پيسې ترلاسه کوي، نو جنګي ډله یې ځان لپاره دا حق ورکوي چې القاعده ډلې سره د اسلامي اصولو له مخې رابطه جاري وساتي.

طالبان اوس په دوه لارې کې بند پاتې دي.

القاعده او نورو ترهګرو ډلو ته یې ویلي چې تاسو به غږ نه کوئ، موږ امریکا ته دوکه ورکوو.

طالبان امریکا ته وایي چې له القاعده سره یې اړیکې پرې کړي او القاعده ډلې ته یې ویلي چې تاسو خوندي ځایونو کې اوسئ او جګړې ته دوام ورکړئ.

طالبان هیڅکله نه غواړي چې مالي سرچینې له لاسه ورکړي، که مالي سرچینې له لاسه ورکوي، نو ځینو مواردو کې مجبور دي چې خپله نولس کلنه جګړه تر سوال لاندې راولي چې جنایتونه یې کړي دي.