د پاکستان د پوځ ترهګري چې خټک ته مالومه ده

پښتون سیاستوال افراسیاب خټک چې کابل ته راغلی و ، دلته یې له بیلابیلو رسنیو سره مرکې کړي چې پکې یې د پاکستان له ځینو رازونو او ځینو حقایقو پرده پورته کړې ده.

د خټک له تحلیل څخه چې پاکستان پوځ او استخبارات له تیرو څو لسیزو راهیسې په افغانستان کې د جګړې لپاره بشري قوه برابروي، امکانات برابروي او له دې درکه اسلام اباد پيسې هم ترلاسه کوي.

هغه ځینې دلایل ویلي چې ښيي پاکستان د افغانستان په جګړه او ترهګرۍ په تمویل کې لوی لاس لري.

د پاکستان پوځ د پښتنو په سیمو کې ترهګرو ته پټنځایونه جوړ کړي او همدا ترهګر بیا افغانستان ته رالیږي او افغانستان کې یې په یو او بل نوم باندې د خپلو شومو ګټو لپاره جنګوي، د خټک په خبره دا خبره پټه نه ده بلکې د پاکستان مخکینیو چارواکو پرې اعتراف هم کړی دی.

د خټک په خبره، د پښتون په خاوره د ترهګرو مرکزونو باندې د پاکستان ریاست پښتانه هم ناکراره کړي او قرباني کړي دي او په یوه او بله پلمه باندې هغه پښتانه له منځه وړي چې د ترهګرۍ خلاف غږ پورته کوي.

هغه د پښتون ژغورنې غورځنګ یو مثال ورکړی چې د ترهګرۍ ضد امن غوښتونکی غورځنګ یې پيل کړی، خو ریاست یې نه پریږدي چې دا غورځنګ پراخ شي، کله یې وژني او کله یې زنداني کوي.

هغه راو انوار او احسان الله احسان ته په خپلو خبرو کې اشاره کړې چې د پښتنو قاتلین دي خو ازاد ګرځي او د پاکستان پوځ او استخباراتو په میلمستونونو کې ځای لري او له ډول محکمې څخه مبرا دي.

خو د پښتون ژغورنې غورځنګ غړي چې د ترهګرۍ پرضد غږ پورته کوي، د غدارانو ټاپي پرې وهل کیږي او بیلابیل وختونو کې زندان ته لیږل کیږي او لیږل شوي دي.

هغه د پرویز مشرف، کرنیل امام او نورو پاکستاني چارواکو په حواله ویلي چې په دې کې هیڅ پټ نه دي چې پاکستان د افغانستان په جګړه کې برجسته رول نه لري، بلکې دا هر څه خپله د پاکستان ریاست منلي دي.

خو له دې ټولو سره سره بیا هم د پاکستان اوسني چارواکي سپین سترګې کوي او په افغانستان کې د ترهګرۍ په تمویل او د جګړې په دوام باندې منکر کیږي.

دغه راز پاکستان د افغانستان د جګړې د دوام لپاره سلګونه مدرسې جوړې کړي چې د سخت دریځۍ درسونه پکې ورکوي او له دې لارو افغانان روزي او بیا یې افغانستان ته د جګړې لپاره رالیږي.

په داسې حال کې چې د پاکستان په پرتله افغانستان کې مسلمانان زیات او افغانستان کې ترې اسلامي احکام ښه تطبیق کیږي.

خو دا چې جاهل ځوانان د پاکستان په مدرسو کې روزل کیږي، په دې ټولو یې سترګې پټي وي او د خپل وطن د وارنولو لپاره له پاکستان ملایانو فتوا اخلي، هغه ملایان چې د پاکستان د استخباراتو په مستقیمه اړیکه کې دي.