افغانستان څخه د امريکايي ځواکونو د وتلو په اړه د ناټو غبرګون

ناټو سازمان په افغانستان کې د امريکايي ځواکونو د شمېر کمولو په اړه په خپل تازه غبرګون کې ويلي، چې دا کار به په افغانستان کې د ناټو ځواکونو د حضور او دغه راز له افغان ځواکونو د ملاتړ په برخه کې د ياد سازمان دريځ بدل نه کړي.
ناټو په دې اړه خپره کړې اعلاميه کې ويلي: «زموږ دريځ نه دی بدل شوی او له افغان ځواکونو سره به خپل ماموريت ته چې روزنه او مشوره ورکول دي، په موجوده چوکاټ او ساختار سره دوام ورکوو.»
ناټو سازمان په خپله اعلاميه کې دغه راز د افغانستان سولې له پروسې د ملاتړ ډاډ ورکړی او ويلي يې دي، چې پر ياده پروسه د يوه اغېزناک سازمان په توګه به په افغانستان کې خپل حضور ته شرایطو ته په پام سره دوام ورکړي.
ناټو دا هم ويلي چې په افغانستان کې به د خپل حضور په تړاو ارزونو ته په دغه هېواد کې د موجوده شرايطو په اساس دوام ورکړي او د ناټو غړيو هېوادونو دفاع وزيران به هم په راتلونکي فبروري کې په دې اړه بحث وکړي: «هر مسير چې ټاکو، نو مهم دی. دا کار په ګډه، په پوره پوهاوي او همغږۍ سره کوو.»
ناټو دغه غبرګون داسې مهال ښيي، چې د امريکا دفاع وزارت پرون جمعه اعلان وکړ، چې په افغانستان کې يې د خپلو سرتېرو شمېر ۲نيمو زرو ته راټيټ کړی.
افغان حکومت تر اوسه په دې اړه څه نه دي ويلي، خو ولسمشر غني له دې وړاندې ويلي و، چې د افغانستان د امنيت بشپړ مسووليت افغان ځواکونه لري او د بهرنيو ځواکونو د وتلو او يا نه وتلو په اړه اندېښنه نه شته.