!!هیڅوک ځان ملامت نه بولي

ته به يې په سترګو وینې چې ملامت دی خو که پوښتنه ترې وکړې سل بهانې او دلایل به درته لټوي خو ځان نه ملامتوي. مجرم هم چي ونیول شي او پوښتنه ترې وکړې، ولي دي داسي وکړل وايي ملامت نه یم زه مجبور سوم چې داسې کار وکړم، دې ته ورته مثالونه نو ډېر دي. اصلي موضوع داده چي ولي انسانان خپلې تیروتنې نه مني. همدا تیره شپه مي یو کتاب وایه چي زما لپاره يې دا خبره ډېره مهمه وه هغه دا چې پکې لیکلي يې وه (( ټول باید په دې پوه شو چې هیڅوک ځان ملامت نه ګڼي.))

ددې پرځای چي بل ته د ملامتۍ ګوته نیسئ نو ښه خبره خو داده چې تاسې دا فکر وکړئ چې ایا زه د نورو پر وړاندې خپله تیروتنه منلای سم؟ که هو نو مهرباني وکړه د اصلاح په موخه یو څه ووایه که دي ځواب یا وي نو بیا هم مهرباني وکړه قضاوت پرېږده.

زموږ او د نورو ټولنې توپیر لري، په پرمختللو ټولنو کې خلک او یو دبل احساسات پېژندلای شي، د غوصې پر وخت ورته پوره حوصله کوي، خلک خپلې تېروتنې مني، بخښنه غوښتل یوه عادي خو خورا مهمه يې ګڼي. د هرې تیروتنې په صورت کې يې ځان عادت کړی په بېړه درته وایي، بخښنه غواړم.

اوس نو راسه موږ ته ! په یوه خبره د سلو مخ پړسوو، چي غوصه راغله تر هغه پورې يې نه پرېږدو چې غاښونه يې ترغوښو ونه کاږو، که ټول ښار راته ملامت ووایي موږ نه سي ملامتولای خپلو تولیدي دلایلو ته دوام ورکوو، بخښنه غوښتل خو د بېغرته سړي کار بولو.

زموږ او د نورو ډېر توپیر شته ، دلته سړک ، پُل ، ودانۍ ، او فابریکې هغومره مهمې ندي لکه ذهنتونه چې باید جوړاو ډېره پانګونه پرې وشي، موږ اوس برعکس روان یو ټوله سرمایه مو پر سیمینټو ، ګاډر، خښتو او ورته برخو مصرف کړه، تعلیم او زده کړه په ډېره کښته برخه کې قرار لري.

داسې سرمایه دار به پیدانکړئ چې حد اقل يې یوه ښوونځئ په شخصي لګښت جوړه کړې وي او ددې کړېدلي ملت بچیانو ته يې په واک کې ورکړې وي. که مو مثال هم راوړ د یوه یا دوه کسانو به وي نو په ۴۰ میلونه نفوس کې دي نو د ۲ کسانو هم خدای مل شي.

خبره بلې خواته ولاړه نه شي، انسانان باید خپلې تېروتنې ومني، د منلو په صورت کې ټولنه د هر ډول ستونزې خلاصېدلای شي که هر لوری ځان پر حق بولې او خپلې تیروتنې نه مني نو الله ج خبر چې دا وړۍ به شړۍ شي. دلته مې سولې ته اشاره ده.

مننه چې لیکنه دي ولوستل.

الله ج مو مل شه.