پاکستان یې غوښتنې په ځای کوي؛ که جانیخېل یې وغولول؟

د پښتونخوا په جانیخېلو کې د څلورو ماشومانو د وژلو په غبرګون کې پیل شوی لاریون د پاکستان حکومت له لوري د لاریون کوونکو له غوښتنو منلو وروسته پای ته ورسېد.
د جانيخیل قوم مشر عدنان ویلي، چې د پاکستان حکومت د دوی غوښتنې ومنلې او نور خپل لاریون پای ته رسوي او وژل شوي هلکان خاورو ته سپاري.
د جانیخېلو لاریون وروسته له هغې زور واخیست، چې د پاکستان حکومت یې په پښتونخوا کې غږ وانه ورېد او دوی د اسلام اباد په لور مخه کړه.
د خیبر پښتونخوا ویاند کامران بنګښ هم ویلي، چې د پاکستان حکومت د لاریون کوونکو ټولې غوښتنې ومنلې او جدي اقدامات به وکړي.
د جانیخېلو لاریون کوونکو له پاکستان حکومت څخه د وژل شویو هلکانو د قاتلینو اعدام، له یادې سیمې څخه د وسله والو وتل، د کورونو نه تلاشي کول او همداشان د نیول شویو کسانو بېرته راخوشې کولو غوښتنه کړې وه، چې د پاکستان حکومت، د پښتنو د یو بې ساري لاریون وروسته ومنله.
باید یاده شي، چې د جانخېلو له لاریون سره سم، په ټوله پښتونخوا کې لاریونونه پیل شول، چې د پاکستان حکومت یې له سختو فشارونو سره مخ کړ.
د جانیخلو لاریون کوونکي په داسې حال کې د پاکستاني حکومت په وعدو باور کوي، چې لاهم د روا انور، نقیب مسعود، ارمان لوڼي او ځېنو نورو پښتنو د وژلو دوسیې د پاکستاني چارواکو د مېزونو شاته پرتې دي.
باید یاده شي، چې د پاکستان حکومت هر ځل له دغه ډول جنایت وروسته د پښتنو د لاریون د غلي کولو لپاره تش وعدې کوي او لایې هم په پښتونخوا کې د پاکستاني پوځیانو د ظلمونو د مخنیوي په اړه هیڅ اقدام نه دی کړی.