د ۱۲۵ هیوادونو له ډلې د هلمند ۵ ښوونځیو د برتانیې سفارت د پوهې جایزې وګټلې

هلمند: د افغانستان په جنوب لویدیځ کې پروت هغه ولایت، چې اکثره وخت ترې د جګړې راپورونه خپريږي.
که څه هم وروستۍ شل کلنې جګړې د هېواد ټول ولایتونه اغېزمن کړي؛ خو هلمند بیا د نورو هغو په پرتله  ډېر زیانمن شوی.
په دې ولایت کې د معارف د دښمنانو له لوري ښوونځي ته د ماشومانو تلل ان تر اوسه کفر ګڼل کیږي او ډېرې سیمې یې لا داسې هم شته، چې دینې زدکړې هم په کې له صفر سره مخ دي؛ خو بیا هم د افغان دولت په هڅو په یاد ولایت په دې وروستیو کې تعلیمي بنسټونو رشد وکړ، چې تېره ورځ یې ۵ ښوونځیو د برتانیه له سفارت څخه د پوهنیز کیفیت د لوړونې په برخه کې جایزې تر لاسه کړې.
هلمند د افغانستان هغه ولایت شو، چې د ۱۲۵ هېوادونو په کتار کې یې د پوهنې په برخه کې د ښه کار له کبله ځانته ځای خپل کړ.
سره له دې، چې لاهم ګڼې ستونزې د هلمندیانو په مخ کې پرتې دي؛ خو دوی په پوره مېړانه خپلو بچیو ته د پوهې مشالونه په لاس کې ورکړي او د تیارو د څملولو چلونه ورښيي.
هلمند د برتانیه له سفارت د پوهې په برخه کې مېډالونه وګټل، نیمروز د کمال خان بند څښتن شو، ۷۰۰ کاله وروسته لښکري کانال په خپله پراخه سینه وچو دښتو ته اوبه ور تېرې کړي؛ لغمان به له شاهي کانال برخمن شي، ننګرهار ته ۴ زره په عصري زدکړو سمبال ښوونکي ورځي، نورستان په ملي پارک بدل شو، خوست به که خدای کول د نړۍ په سطحه تر ټولو ډېرې ونې ولري، د پکتیا جنغوزیو بېرته په نړیوالو مارکېټونو کې نوم پیدا کړ… او بلاخره به که خدای کول یو ځل بیا دا هېواد لکه لمر په شنه اسمان وځلیږي.
مونږ به یو وار بیا نړۍ سره وصل کړو، اسیا به له اروپا سره ونښلو او خپله به د بلې فضا نوردي خوبونه رېښتیا کړو.