جرمني سفارت: د طالبانو په بریدونو کې ۳۰ سلنه ماشومان زیانمن شوي

 افغانستان کې د طالبانو له لوري د تاوتریخوالي کچه لوړه شوې، چې ۳۰ سلنه ماشومان تر زیانمن شوي دي.
د جرمني سفارت تېره ورځ د ماشومانو د ورځې په مناسبت په خپل ټوېټر کې لیکلي، چې د دوی د څېړنیز راپور له مخې، په ۲۰۲۰ میلادي کال کې د طالبانو په بریدونو کې ۳۰ سلنه ماشومانو ته مرګ ژوبله اوښتې، چې راتلونکی یې له ننګونو سره مخ دی.
دوی ویلي، چې طالبان باید د تاوتریخوالي کچه ټیټه کړي؛ ځکه یوازې ملکي وګړي په ځانګړې توګه ماشومان ترې زیانمنېږي.
د یاد سفارت د څېړنیز راپور له مخې، په هر سلو ماشومانو او ځوانانو  کې ۵۲ یې په ښوونځیو او پوهنتونو کې د مصونیت ډاد نه لري.
راپور کې د طالبانو له لوري د دشت برچي «د سید الشهدا» پر ښوونځي برید ته په اشارې ویل شوي، چې طالبان لا هم د زده کړو خلاف دي او ماشومانو ته اجازه نه ورکوي، چې په ارامه فضا کې خپلو زده کړو ته دوام ورکړي.
دوی ویلي، چې د طالبانو له لوري د ملکي وګړو وژنه د منلو وړ نه ده او عاملینو ته یې باید سزا ورکړل شي.
طالبانو یوازې په تېره میاشت کې پر ملکي وګړو داسې بریدونه ترسره کړي، چې په کې سلګونو ماشومانو او ځانوانو ته مرګ ژوبله اوښتې ده.
دغه راز په لوګر کې د طالبانو په موټړ بم برید کې د کانکور ازموینې زده کوونکي او تر سلو زیات ملکي وګړو وته مرګ ژوبله اوښتې وه.