جېمز: يو شمېر امریکايي پوځیان دې افغانستان کې پاتې شي

د افغانستان روان وضعیت او د طالبانو له لوري د تاوتریخوالي کچې لوړېدو ته په کتو باید، یوه ډله امریکايي پوځیان په یاد هېواد کې پاتې شي.
وال سټريټ ژورنال د امریکايي سناتور جېمز اینهوف مقاله خپره کړې، چې په کې راغلي، له افغانستان څخه د امریکايي سرتېرو د وتلو پرېکړه په بېړه شوې ده.
نوموړي ويلي، چې بایډن له افغانستان څخه د امریکايي سرتېرو تر وتلو وروسته د بدو پېښو په اړه فکر نه دی کړی؛ ځکه یې داسې پرېکړه کړې ده.
اینهوف ویلي، چې په دوحې کې د افغان سولې خبرې یوې پایلې ته تر رسېدو پورې د امریکايي سرتېرو یوه ډله باید په افغانستان کې پاتې شي.
ده زیاته کړې، چې افغانستان کې روان وضعیت اندېښمن دی؛ ځکه طالبان هره ورځ د لا ډېر امتیاز ترلاسه کولو په موخه پر ملکي وګړو بریدونه کوي او د تاوتریخوالي کچه ورځ نه بلې لوړیږي.
باید یاده شي، چې امریکا کې یو شمېر چارواکي او سیاسي شنوونکي هره ورځ د بایډن له پرېکړې سره خپل مخالفت اظهاروي او زیاتوي، چې باید د دوی سرتېري په افغانستان کې پاتې شي.
دوی وايي، چې لا هم افغانستان کې طالبان له القاعدې ډلې سره اړیکې لري او امریکا ته په لوی ګواښ بدلېدلی شي.