امریکایي ځواکونو کندهار کې پر طالبانو هوایي بریدونه کړي

یو شمېر امریکايي چارواکو ویلي، چې د افغان ځواکونو پر ملاتړ یې کندهار او د افغانستان پر یو شمېر نورو ولایتونو کې پر طالبانو هوايي بریدونه کړي.

د اسوشټیډ پریس خبري اژانس د راپور له مخې، یاد بریدونه د هغو جنګي الوتکو په وسیله شوي، چې له افغانستان څخه د باندې ځای پر ځای شوې دي.

د امریکا د فاع وزارت ویاند جان کربي هم ویلي، چې دوی د افغان ځواکونو پر ملاتړ پر طالبانو هوايي بریدونه کړي؛ خو دا یې نه دي ویلي، چې یاد بریدونه یې له کومو سیمو څخه کړي دي.

یو بل لوړ پوړي امریکايي چارواکي هم دغه راز زیاته کړې، چې د تېرې چهارشنبې او پنج شنبې په ورځ امریکايي ځواکونو پر طالبانو څلور هوايي بریدونه کړي، چې ګڼ شمېر مالي او ځاني تلفات یې ور اړولي دي.

باید یاده شي، چې امریکا د قطر په شمول په خلیج هیوادونو کې ډول ډول جنګي الوتکې لري چې په افغانستان کې هدفونو ته ځان رسولای شي.

تر دې وړاندې بیا  منځني ختیځ کې د امریکا د پوځي قومنداني پخواني قومندان سکاټ مېلر او یو شمېر نورو جګپوړو امریکايي چارواکو ویلي وو، چې امریکا به له پوځي حضور پرته هم افغانستان کې ترهګرې ډلې تعقیب کړي.