دوى دا ځانمرګي بريدګر د همدې لپاره روزل؟

نظام د يو لوښي په شان دى؛ کله چې لوښى چټل شي لومړى يې وينځو او بيا پکې خواړه خورو. که نظام فاسد شي له منځه وړل يې پکار نه دي بايد اصلاحات پکې راشي. دوى د تېر نظام پر ضد په دې نوم جګړه کوله چې هغې کې فساد و، بې عدالتي وه، فخشاﺀ پکې وه، امن نه وو او د امریکا ګوډاګى و. خو اوس د دوى په نظام کې فساد څو برابره زيات شوى دى، تعلیم يافته ځوانان بې کاره ګرځي او د مدرسې فارغين په لوړو بستونو مقررېږي. پخوا که څه هم واسطې او رشوت و خو بيا به هم کار اهل کار ته سپارل کېدو، اوس خو يې په هر څه کې مولوى صيب او د هغې ملګري ورمنډلي. پخوا فحش و خو اوس له هغې ډېر دى، شراب اوس هم شته، پخوا به يواځې پنجشيريانو لنډه غري کوله اوس د ټول هېواد په ګوټ ګوټ کې کېږي. پخوا امن نه و خو اوس دومره امن راغلى کوم چې دوى له منځه وړى و، پخوانى حکومت ګوډاګى و خو دوى هم خپلواکه نه دي. خو ښکاره خبره ده چې موخه يې يواځې د افغانستان ورانول او د اسلام له نومه په استفادې ځان واک او قدرت ته رسول و. ملي اردو له منځه ولاړه، ملي بيرغ، ملي سرود او نور ملي ارزښتونه له منځه لاړل، په لکونو بې ګناه خلک ووژل شول، په زرګونو ځوانان بې دندې شول او په زرګونو نورو يې وطن پرېښود. ايا دا هر څه د همدې لپاره و چې حقانيان ډمې وګډوي، شراب وڅښي او د افغانانو شتمنۍ لوټ کړي؟ دوى دا ځانمرګي بريدګر د همدې لپاره روزل؟