روژتۍ لنډۍ – پنځمه برخه

د خرما زړي یې قطار کړل

د تراوو رکعات په دې معلوموینه

 

روژه په خوله نورو ته گوري

خوله بنده کړې، سترگې هرخوا غړوینه

 

اوس یې سودا له سره باسم

تر روژې وروسته یې وعده ده رابشینه

دا هم څو داسې نوې لنډۍ چې د روژې له پاره تخلیق شوې دي:

له خوبه پورته سه کم بخته

هر پيشلمی دې پلار لغتې درکوينه

 

د خرما زړي یې قطار کړل

د تراوو رکعات په دې معلوموینه

 

تر پیشړمی به درسره یم

نوره روژه ده جوړه نه کېـږی خوبونه

 

خلک روژې سره عادت دي

زموږ کلیوال خو سر و کال هم روژه وینه

 

روژه په خوله نورو ته گوري

خوله بنده کړې، سترگې هرخوا غړوینه

 

اوس خو روژه ده درتلای نه شم

چې روژه تېره شوه بیا هره ورځ درځمه

 

روزه بوزه کې توپیر نه شته

ډوډۍ چې نه وي، نس به وږی گرځومه

 

چې روژه راغله هرڅه بند شول

له هرڅه تېر یم تش یې غواړم دیدنونه

 

د پـیشړمي سودا اخیستی

په کټ کې پروت دی د روزې کوي سوچونه

 

خواته رانه شې زما یاره

پیشمنی تېر شو ملا کړي دي بانگونه

 

د روزه مات په وخت حیران یم

ما ته یادېـږي د جانان د لاس خوندونه

 

تر روژې وروسته چې دې ووې

زما له سترگو نه دې خوب وتښتاونه

 

په کرارۍ روژه روانه

تر روژې وروسته به د یار دیدن ته ځمه

 

ښار کې کراره کراري ده

روژه راغلې خلک کړي عبادتونه

 

په کړېدو به خدای راضي وي

چې په روژه کې نه قبلېـږي مې سوالونه

 

په کرارۍ به عبادت کړو

روژه اوږده ده گوندې ومني سوالونه

 

کړکۍ کې نیمه راښکاره شه

په تش دیدن دې روژه نه مکروه کوینه

 

ته د روژې ماښام کې راشه

زه به تیار کړم روژه مات کې نعمتونه

 

اوس یې سودا له سره باسم

تر روژې وروسته یې وعده ده رابشینه

 

روژه کې هرڅه رانه هېر شول

نه یې دیدن شته نه پخوا غوندې لیکونه