روژتۍ لنډۍ-۷

لنډۍ، د ثبتولو ستونزه

اومه برخه

یو سلواوه ویشتمه برخه

ځان مې روژه کې جنتي کړ

گنگسیت مې والوت گنهکار دوزخي ومه

 

په تعویزونو جنت نه شي

اړین شرطونه دي روژه عبادتونه

 

یو د روژې بل د ملا غږ

چې لاسپیکر کې وعظ شروع کړي زړه مې چوینه

 

د دې برخې له پاره دا  نوې لنډۍ راټولې شوې دي:

 

د روژې شل ورځې په خیر شوې

باقي به گورو چې به څه کېـږي میینه

 

اوس دیدونونه هم ستونزمن دي

یو خوا روژه بل خوا طالب میین سېزینه

 

پخوا مې هیله د دیدن کړه

جانانه مخ مه راړوه چې روژه یمه

 

بې پېشړمي روژه په خوله یم

چا نه گیله ده زې بیده پرېیښی یمه

 

ځان مې روژه کې جنتي کړ

گنگسیت مې والوت گنهکار دوزخي ومه

 

په تعویزونو جنت نه شي

اړین شرطونه دي روژه عبادتونه

 

روژې له رنگه هم ور تور کړم

چې نور به څه کړي سودایي شومه میینه

 

روژې ته ټینگ یم، شي به خلاصه

بده نیستي ده چې سودا یې وړی یمه

 

یار په روژې کړوپ شوی نه دی

دا بېکاري او بېوسي یې زوروینه

 

یار یې په کور راته بندي کړ

یو خوا روژه ده بل خوا نه شته دیدنونه

 

روژه دیدن سره جوړ نه دي

چې مکروهات وي، بیا خو نه شته ثوابونه

 

روژه د خیر او کرم میاشت ده

زه چې زورېـږمه څه نور دي تومتونه

 

روژې کې هېڅ قصور هم نه شته

په ماپسې دي د نیستۍ لښکر ویرونه

 

په روژتي ټولي کې بند شوم

خلاصی مې نه شته، په هرپل خورم تیندکونه

 

یو د روژې بل د ملا غږ

چې لاسپیکر کې وعظ شروع کړي زړه مې چوینه

 

یوخوا روژه بلخوا وعظونه

لاسپیکرونه په لوري شول بمونه

 

د روژه مات په وخت به درشم

داسې خو مه وایه چې پلار دې نه پرېـږدینه

 

که په دیدن روژه ماتېـږي

ما خو په خدای که لا یوه نیولې وینه

 

د روژې ډېر به وي شرطونه

د یار دیدن خو روژه نه مکروه کوینه

 

روژه ثواب سره تړلې

روژه په خوله یم، خو دیدن ثواب گڼمه