د خیبر پښتونخوا د سلېمان غره په ځنګل کې د څو ورځو راهیسې اور لګیدلی

عيني شاهدان وايي چې له تېرو لسو ورځو راهیسې د خیبرپښتونخوا د سلیمان غر په سلسلو کې د ډېره اسماعیل خان د مغل کوټ سیمې په ځنګله کې اور لګیدلی دی. دوی ويلي دي چې اوس د انور کلان کلي د مڼې غره کې هم ځنګله اور اخیستی. یوه عیني شاهد او ځایي خبریال انور خطاب مونږ ته وویل، د مغل کوټ اور د برېښنا د شارټۍ له امله بلل کیږي، چې اوس مهال یې څپه بلوچستان ته رسیدلې او د مڼې غره اور هم د پراخیدو په حال کې دی. نوموړی وایي، په بلوچستان کې د هلیکوپترو په مرسته د اور مړ کولو هڅې پیل شوې دي، خو د مغل کوټ په تور نیشپه او د نورکلان په مڼې غره کې د اور مړ کولو له پاره د پاکستان حکومت تر اوسه کوم اقدام نه دی کړی. د ځایي خلکو په خبره تر اوسه تر لسو جریبو ځنګل سوځیدلی دی او لسګونه کورنۍ چې په ځنګله کې لګیدلي اور ته نږدې اوسیدې د خپلو کورونو پریښودو ته اړ شوې دي. نن له جمعې لمانځه وروسته په ډېره اسماعیل خان کې ځایي خلکو لاریون کړی، د یوه ساعت له پاره یې عمومي سړک تړلی و او له حکومت نه یې غوښتنه کوله چې په بیړني ډول اور مړ کولو له پاره اقدام وکړي. ځایي خبریال عمر خطاب وایي، خلکو د پاکستان له حکومت غوښتنه کوله چې د هلیکوپترو په مرسته دې اور مړ کړي، او کنه د احتجاج په توګه به د ډېره اسماعیل خان لویه لاره د ترافیکو پرمخ وتړي.