د فروغ لیکونه

فروغ فرخ زاد د ۱۳۱۳ د جدي په ۱۵ زیږیدلې او پرویز شاپور د ۱۳۰۲ د حوت په ۵.
د دوي تر منځ د لیکونو تبادله له ۱۳۲۹ پیل شوې. په دې کال فروغ ۱۶ کلنه او پرویز ۲۷ کلن و.
۱۳۳۴ هم د لیکونو د پای کال دی. په دې کال، فروغ ۲۱ کلنه وه او پرویز ۳۲ کلن.
فروغ د ۱۳۴۵ د دلوې په ۲۵ نیټه د موټر د ټکر له امله له نړۍ سترګې پټې کړې او پرویز د ۱۳۷۸ د ثور په ۱۵ نیټه. فروغ ۳۲ کاله ژوند وکړ او پرویز ۷۶ کاله.

له اړیکې وړاندې

۱
پرویزه، د خپل لیک ځواب ته به دې هرومرو په تمه یې. ما فکر کاوه، چې میرمن بدیعې به تا ته هر څه ویلي وي او نور به یې تکرار ته اړتیا نه وي خو له بل پلوه دا فکر، چې ممکن ته به لا نه پوهیږي چې ما دې د هغه غوښتنې په تړاو څه پریکړه کړې؛ ما زوروي.
ما دې لیک ولوست. سمه ده، چې ما له تا دا تمه نه درلوده، خو ستا لپاره یې منم او نور مې هم رازي کړي او له هغه پلوه بېغمه اوسه. تا په ټيلفون کې راته وویل، چې ټاکلې ورځ باید د جمعې ووسي. ډيره ښه ده، که پریکړه دې جدي ده، نو بیړه کوه؛ ځکه چې د جمعې ورځې ته یواځې پنځه ورځې پاتي دي او موږ په دومره کم وخت دومره ډيرو کارونو ته رسیدګي نشو کولای. دا زما ځواب دی
موافق موافق ستا د اقدام په تمه یمه.

خدای پامان
فروغ