له تیروتنو زده کړه /غنچه ګل

له تیروتنو زده کړه

ژباړه: غنچه ګل آرمان
توماس اډيسن چې کله برېښنايي څراغ جوړاوو، دوه زره ډوله بېلابېل مواد يې وازمايل، مګر يو ډول موادو هم سم کار نه کاوو. د دغه حالت په ليدو يې د مرستيال زړه را تنګ شو او ويې ويل: زمونږ دا ټول کار هسې بې ځايه دی. مونږ هېڅ هم نه دي زده کړي. فکر نه کوم چې مونږ دې له برېښنا څخه سمه ګټه واخيستی شو.
اډيسن په خورا آرامه لهجه ځواب ورکړ: ولې نه؟ مونږ ډېر کار کړی او ډېر څه مو زده کړي. اوس مونږ پوهيږو چې دوه زره ډوله مواد داسې دي چې د ښه څراغ په جوړولو کې نه شي کارېدی.
درس
تېروتنې او په چارو کې پاتې-راتګ د ژوند نه بېلېدونکې برخه ده. په شخصي ژوند کې، په کار او کور کې، په ټولنيزو اړيکو کې، په سوداګرۍ او درس کې، لنډه دا چې د ژوند په ټولو اړخونو کې تېروتنې او پاتې-راتګ حتمي دی. مګر ډېر خلک له دغې تجربې سره سم چلن نه کوي. ځينې په تېروتنو او ناکامۍ اقرار نه کوي. ځينې پرې دومره د پښېمانۍ احساس کوي چې بيخي يې هېرولی نه شي او تر عمره ترې ځوريږي. مګر داسې نه ده. تېروتنې او پاتې-راتګ د ژوند ارزښتناکې تجربې دي او بايد زده کړه ترې وشي. سړی بايد نه د خپلو تېروتنو د نه منلو له کبله د نورو تېروتنو مرتکب شي، او نه ترې بايد د ژورې پښېمانۍ له کبله د زړه رنځ جوړ کړي. له تېروتنو او ناکامۍ سره وړ چلن دا دی چې له هر څه مخکې بايد سړی ومني چې تېروتنه يې کړې يا په کار کې پاتې راغلی. بيا يې بايد د نه تکرار او سمون له پاره ګامونه واخلي.
کله مو داسې ماشوم ليدلی چې لومړی وار دريږي؟ که ليدلی مو وي خامخا به مو فکر شوی وي چې ماشوم سره له دې چې د درېدو پر مهال بېرته غورځيږي، مګر هغه دغو غورځېدو ته ژاړي نه او له هڅې لاس نه اخلي، بلکې خاندي او د بيا، بيا درېدو هڅه کوي. په دې توګه له څو ورځو جګېدو او غورځېدو وروسته نه يوازې دا چې سم درېدل زده کوي، بلکې د ګرځېدو او روانېدو هڅه کوي. مونږ بايد له خپلو تېروتنو سره همدغسې چلن وکړو. تېروتنو ته بايد د پياوړتيا او سمون د فُرصتونو په توګه وګورو، نه دا چې يا انکار ترې وکړو او يا يې ځان ته د زړه رنځ وګرځوو چې ټول عمر ترې ځوريږو.