د افغانستان د روانې کشالې یو ستر لامل د پښتون اکثریت محرومیت ده/ عبدالمالک ستانیزی

د افغانستان د روانې کشالې يو ستر لامل د پښتون اکثريت محروميت ده!
هغه پښتانه چى په موجود نظام کى د پښتنو له ادرسه ښکته پورته کيږي، اکثره بهرني تبع دي، ولسي نفوذ او ملاتړ نلري، نه دوى پښتنو ته څه وکړل، او نه پښتانه د دوى ملاتړ کوي، دوى ټول عمر د خپل ولسي ملاتړ د نشتوالي له امله ټلوال خېلو سره په عذر، زارۍ او محافظه کاري کى تېر کړ، او پښتانه ولسونه جنګ او جګړو وخوړل، لنډه دا چى پښتانه خپل ممثلين او خپل انځور په حکومت کى نه ويني، او نه د پښتنو په ادرس امتياز اخيستونکي له خپل پښتون ولس سره همدردي لري، پښتنو سره لا تر اوسه د محروميت احساس شته، خپل نظام او خپل حکومت ورته خپل خپل نه بلکى پردى پردى ښکاري، پښتنو ته لا تر اوسه ځان مظلوم ښکاري، د بمبار، چاودنو، وژنو، چاپو، غلا، شوکو او نورو مظالمو ښکار پښتون ولس د خپل مشرتابه په وړاندى عقده اخيستې، پوهيږي چى زما حق چا وخوړ، ولى نالوستي، فقير او مظلوم پاتى يو، تر ټولو مهم لا دا چى ددوى عقيدوى پوښتنې چا ور ځواب نکړې، هغه چا به چى خپل تربور تر پرونه په عقيدوى مبنأ پې واژه نن خپله د همغې فتوا په زد کى ورته راغلي، نو دا سر بداله ولس څنګه د همغو مشرانو هرې خبرې ته لبيک ووايي؟
په تېرو اولسو کلونو کى د کابل په مرکزى اداراتو کى پښتو ژبې او پښتنو سره سليقوي برخورد عقدې زېږولي، ددې عقدو درک ښارميشتي او امتياز اخيستونکي پښتانه نشي کولاى، خو په اطرافي سيمو کى فوق العاده امپکټ لري.
#ريښتونى_تصوير