که داسې نه‌شئ کولای، ماشوم مه زېږوئ / نظيره رسولي

۱. هیڅکله ماشوم ته مه وایه چې پر دېوال لیکل مه کوه، هغه ته وایه، پر ورقه یې ولیکه چې پر دیوال یې وځړوو.
۲. مه ورته وایه چې پورته دا ګډوډه کوټه ټوله کړه، بلکې ووایه پوهېږم چې ګډوډي دې نه خوښېږي، راځه په ګډه يې ټوله کړو.
۳. ماشوم ته داسې مه وایاست چې لوبې پرېږده او درس ووایه، بلکې داسې ورته ووايه چې که چېرته ښه درس ووایې، دواړه به یو ځای لوبې وکړو.
۴. د مشرانو هره کړنه د ماشوم پر شخصیت خورا اغېز لري.
۵. د ماشومانو کړه وړه د لویانو د کړو وړو هينداره وي.
۶. ماشوم ته تل په درناوي غږ کوئ.
۷. لږ تر لږه په ورځ کې یو ځل ماشوم ته واياست چې راته ګران يې، درباندې وياړم.
۸. ماشوم ته د مېلمه په شان احترام کوئ او شخصیت ته یې ارزښت ورکړئ.
۹. پر ماشوم مو باور ولرئ، په دې ډول به ستاسې په خوښه کارونه وکړي.
۱۰. تر هر څه مخکې مو له خاوند سره د ماشوم د روزنې برخه کې د نظر توپیرونه له منځه یوسئ.
۱۱. تر اوو کالو له ټیټ ماشومه مه لېرې کېږئ، ډیرې خبرې ورسره کوئ.
۱۲. د ماشوم تر مخ مو له خاوند سره اړیکې لا ښې وساتئ.
۱۳. د زړه له تله مو له ماشوم سره مینه کوئ او تل یې ورته اظهاروئ.
۱۴. تر درې کلنۍ وروسته لږ لږ مسولیتونه ورکوئ.
۱۵. پر الله «ج» ایمان ولرئ او کورنۍ مو هم پر کلک ایمان سمباله کړئ، ځکه له زړه مسلمان ماشوم په ناسمو لارو نه ځي.
۱۶. د ماشوم تېروتنې مو وبښئ او وخت ورکړئ چې د زړه خبرې درته وکړي، ځینې وخت د تېروتنې او بېرته جوړولو وخت ورکوئ.
۱۷. هره ورځ مو له ماشوم سره لوبې کوئ او کله کله د لوبو په منځ کې ډېر خاندئ.
۱۸. له ماشوم سره د پلي ګرځېدو له پاره ورځې وټاکئ.
۱۹. د خپل ماشوم له‌پاره مو د رښتینولۍ، په خبره درېدل او د غوسې د کنټرول په برخه کې رښتینی لارښود اوسئ.

سرخط ورځپاڼه