زما له نظره ملا د روانې غمیزې لومړنی قرباني دی/ خوشال خلیل

نن د ملا باره کې ډېر پوسټونه وشول، خو زما له نظره #ملا د روانې غمیزې لومړنی قرباني دی. زموږ دودیز ملایان خپلو جوماتونو کې ناست وي، یو چڼی چې هیڅ سبق یې نه وي ویلی ورته راشي ملا راکاږي ورته وايي ولي جهاد نه کوي ولي د جهاد غږ نه پورته کوې، بي عزته کوي یې او رټي یې، بیا د ملا جومات کې طالب سنګر جوړ کړي دولتي عسکر ورشي اول ملا راکاږي.
بل #ملایان ساده خلک دي، دوی اکثرو پاکستان کې سبق ویلی دی، یو شمېر یې فکر کوي چې رښتیا هم دلته جهاد رواه دی، نو د طالب په لیکو کې هم اول #ملا وژل کېږي، بچیان یې یتمان کېږي او ټوله هستي یې ختمېږي. لنډه دا چې له ملا څخه د روان جنګ د سون توکو په څیر استفاده کېږي، دغه قشر سره د دښمنۍ په ځای باید زړه پرې وخوږول شي، ځکه دوی نه په ټولنیز لحاظ ښه موقف لري، نه سیاست کې او نه هم له اقتصادي لحاظه بهتر حالت کې دي. په دومره پریمانه پیسو کې چې هېواد ته راغلي د ملایانو لپاره هیڅ داسې پروژه ډیزاین نشوه چې ملایان راټول او معاصر کسبونه لکه اداره، منمجمنټ، تجارت او نورو شیان ور زده کړي چې د ملايي تر څنګ کسب او کمال هم مخې ته بوځي او د خلکو له ټوک خوړولو نه خلاص شي.
اوس چې ملايان تازه پوه شوي چې پاکستان يې د خپلو ګټو لپاره کاروي او اوسني حکومت ورته توجه زياته کړې ده، پاکستان په هيڅ صورت دا نشي زغملی چې افغان ملايان د دوی له ديني مراکزو او تولید شویو ادبیاتو خپلواک فکر وکړي او د پاکستان په ځای د خپل حکومت او ملت ګټې مهمې وګڼي.