خوشال خلیل/ تاته هيڅوک د خير لپاره وسله نه درکوي په شر دې اړوي

چې د نجيب خلاف يې وسلې او خرماګانې درکولې هغه وخت امريکا اهل کتاب او ښه کافر و. اوس روس درته ښه کافر ښکاري او وسلې ورنه غواړې. تاته هيڅوک د خير لپاره وسله نه درکوي په شر دې اړوي.
بل، هغه چې تر پرونه يې امريکايانو سره ترجماني کوله او نن امريکا کې اوسي او پمپ ستشن کې مزدور دی، تنخوا يې کمه او ټکسونه يې زيات دی، چې ميرمن سره يې شخړه راشي فيس بوک ته کيني او د حکومت خلاف د طالب ننګه کوي، دوی ته دې امريکا مبارکه وي خو زموږ ځوانان دې جنګ ته نه تشويقوي.
هيله ده نور هيڅ جومات او مدرسه کې بمونه جوړ نشي او نه هم د ترهګرو د ځالې په توګه وکارول شي، بيا ددې هيله هم کوی شو چې هيڅ جومات او مدرسه بمبار نشي.
ځيني طالبان د جنګ نړيوالو قوانينو ته پنا وړي وايي د کندز بريد د نړيوالو قوانينو خلاف عمل دی، دا خبره زه کوم چې دا عمل د نړيوالو قوانينو خلاف دی، ته خو نړيوال قوانين هيڅ نه مني حتا د جنګ اسلامي قوانین هم نه مني.
خو تاسې بايد پوه شی چې ټرمپ او اوباما فرق لري، اوباما د جنګ نړيوالو قوانينو ته ژمن و، تاسې هغه وخت هم نړيوال قوانين نه منل، ټول عمر مو ملکي اهداف په نښه کول اوس خو د ټرمپ دور دی هغه په ملګرو ملتونو هم ریشخند وهي او دا قوانين ورته ګپ ښکاري، ټرمپ په ګپ نه پوهېږي او د ايران او پاکستان پلوو ډلو لکه طالبانو خلاف هر نړيوال قانون تر پښو لاندی کوی شي. نو ښه دا ده چې هيڅ طرف جنګ توجيه نکړي او د پرديو لپاره ځانونه قربان نکړي، هوښيار طالب هغه دی چې دا نامشروع او بې هدفه جنګ بند کړئ‌ او د ټرمپ او پوتين جګړه کی خپل کلی وران نکړي.
زه حتا د طالب په وژلو هم خفه کېږم، هغه هم مور خور لري او سبا به يې يتيمان او کونډې چيرته ځيره ټولوي. جنګ بد دی او جنګ مو مشروعيت نلري.