دلته دغه جهاد، يوه ته تفرېح ده بل ته ابدي درد

انجنیر هابېل
دوه کاله مخکې له پوهنتونه فارغ شو، د کور یوازینی هراتی و، چې د سرک سازۍ برخه کې یې لسانس په څه
خوارۍ او لېونۍ غریبۍ کې واخست.
دوه کاله وروسته یې فواید عامه کې یو خالي بست ته امتحان ورکړ، کله چې یې ددوشنبې په ماسپښين وزیر د مقررۍ په مکتوب امضا وکړه، د بخت شمعه یې روښانه شوه، له خوشالۍ یې د زړه درزا د شمېرلو نه وه.
لا یې د مکتوب د ثبت پروسه تکمیل شوې نه وه، چې پينځه وحشي ځناور د فواید عامې وزارت ته ننوتل، 
اخري مسج یې خورکۍ ته وکړ; 
((ځانمرګي وزارت ته راننوتل))
پينځه دقیقو کې یې مبایل خاموش شو.
درسته شپه ماما یې چې زموږ همکار و، په عبدالحق څلور لاره کې ورته منتظر و. شپه دوبجې عملیات خلاص شول، ماما یې او همکارانو یې وزارت پسې چاڼ کړ، په جسدونو کې یې خپل خوریي پسې دهلیزونه، کنډوالې ولټول…..
ایله غرمه یوولس بجې یې جسد پيدا شو، په ملا لګېدلی و، له زړه یې توره، توده او کافره مرمۍ وتلې وه.
څلور بجې مو هرات ته الوتکه کې بار کړ، دنګې ځوانۍ ته یې موږ ټول په ملا کړوپ شوو….
اوس به یې د کور، خویندو، پلار او مور غم، د زړه څړیکې او ساندې په هرات چلېږي…….
چې دبخت شمعه یې ولګېده طالب خبیث یې د ژوند شمعه ور ورمړه کړه…..
دلته دغه جهاد، او د غزا فتنه روانه ده، يوه ته تفرېح ده بل ته ابدي درد.
د طالب سره به په کوم رقم سولې ته د خلکو زړونه سپين شي.

اباسین بریال