په ۱۹۷۱ م کال کې، چې څرنگ بنگالي ولس ته ثابته شوہ، غربي پاکستان سرہ یو ځایوالی ورته د خپل ملي ھویت، ژبې او په اکثریت کې د اقلیت سلوک، پر قیمت تمامیږي نو یې و پتئیله چې د پنجابي استبلشمنټ څخه ځان آزاد کړي.
مبارزہ او مجاھدہ یې وکړہ، قربانۍ یې ورکړې او ځان یې د نړۍ په نخچه کې د یوہ خپلواک ھیواد په توگه ثبت کړ.
خو زما سلام ورته پر دې نه دی، ځکه دا د ھغوی د ملي ھویت جگړہ وہ نو باید کړې یې وہ!
زما سلام ورته پر دې ھم نه دی چې د پنجابي استعمار څخه د ازادۍ په جگړہ کې یې خپلو ھغو بنگاليو غدارانو ته عمومي عفوہ اعلان نه کړہ چا چې د اشغالگرو سرہ مرسته کړې وہ.
بنگالي ولس ھغو ملي خاینینو ته ھم عفوہ ونکړہ چې د دین او مذھب له نوم څخه پر گټه اخیستنې یې له مور وطن سرہ خیانت کړی و، بلکې تر نورو ړومبی یې ھمدا مذھبي مشران د جماعت اسلامي د امیر مطیع الرحمان نظامي او نورو اوہ مشھورو څیرو په شمول را ځوړند کړل.
خو بیا ھم زما د سلام لامل دا نه دی. دا یې باید ھمداسې کړي و ځکه چې نور ترې عبرت واخلي او بیا په راتلونکې کې کوم بنگالی له وطن سرہ د دا راز غدر سوچ ھم ونکړي!
بنگله دیش د خپلې ازادۍ ( ۱۹۷۱ م ) له وخته د پدما پر سیند د خپل تاریخ تر ټولو لوی پول د جوړولو ارادہ لرله، خو د سیاسي او اقتصادي ستونزو له امله یې دا سترہ پروژہ چې د بنگله دیش په اقتصاد کې یې د ملا تیر حیثیت درلود، نشوہ عملي کولای.
پر پول ۳،۶ بیلونه ډالر مصرف راتلل، نړیوال بانک د ۱،۲ بیلونه ډالرو پور وعدہ کړې وہ او ھمدا رنگ نورو غربي استعماري مرستندویه ادارو ھم.
خو، کله چې سروې او نور لومړني مراحل تیر شول او پر پول عملاً د کار پیلولو مھال را ورسید، نړیوال بانک او پر تعقیب یې نورو غربي مرستندویه ټولنو د پور له ورکولو انکار وکړ. ھغوی استدلال کاوہ چې بنگله دیش پر مالي فساد اخته دی!
خو بنگالی ولس ځیرک و، ډیر ژر پر دې وپوھید چې د غربي استعمار ھیڅ مرستندویه ادارہ د دریمې نړۍ له داسې عام المنفعه پروژو سرہ مرسته نه کوي چې وروسته پاتې ټولنې د اقتصادي ازادۍ په طرف بیایي. که نه د بنگله دیش په دولتي ادارو کې خو مالي فساد ھغه مھال ھم و چې نړیوال بانک او نورو ورسرہ د مرستو ژمنې کولې!
د بنگله دیش د ھغه مھال صدر اعظمه شیخ حسینه واجد د غربیانو پر دې وعدہ خلافۍ دومرہ نا ارامه شوہ چې خپل نور ټول کارونه یې شاته واچول، د پدما پول جوړولو ته یې اولیت ورکړ او د خپل ولس په مرسته یې د دې سترې پروژې تمویل او تکمیل ته مټې را نغاړلې.
د پدما پول پروژہ بنگالیانو پخپلو مالي امکاناتو په ۲۰۱۴ م کې پیل او په جنوري ۲۰۲۲ م کې په بریالیتوب سرہ سرته ورسوله.
خو بیا ھم زما سلام ورته پر دې نه دی. دا د بنگالي ولس د ملي غیرت مسئله وہ او باید ھمداسې یې کړي و!
دوستانو!
بنگله دیش د آسیا په جنوب کې د بنگال خلیج پر غاړہ پروت د نفوس له مخې د نړۍ دریم ستر اسلامي ھیواد دی چې تل د خپل جغرافیایي موقعیت له لاسه د سمندري توپانونو او سیلابونو له ورانکاریو څخه ځوریږي.
کله د بارانونو د ډیر ورښت او کله د سمندر د یاغي کیدو له امله د تگ راتگ لارې او سړکونه بند او ژوند پر ټپه ولاړ وي.
نو ددې لپارہ چې په سیلاب ځپلو سیمو کې یې ماشومان له تعلیم څخه محروم پاته نشي، د بنگله دیش حکومت د ځینو خیریه بنسټونو په مرسته د Floating School یا د کښتۍ ښوونځۍ ایجاد کړې.
دا داسې ښوونځۍ دي چې ټولگي یې په کښتیو کې دي، باد، باران، سیلاب، توپان او بل ھیڅ راز ناوړہ طبیعي آفت یې د ماشومانو پر مخ د ښوونځیو دروازې نشي تړلای!
که اوبه ټول وطن ھم ونیسي، بنگالي ماشومان د وړو وړو کښتیو په وسیله خپلو ښوونځیو ته روان وي!
د بنگله دیش دولت دا تر بل ھر چا ډیرہ ښه درک کړې چې پر یوہ ملت رښتینی توپان ھغه مھال راځي، کله یې چې د ماشومانو ( ھلکان او جینکۍ ) پر مخ د علم دروازې وتړل شي!!
بنگالی ولس تر بل ھر چا پر دې ډیر ښه پوھیږي چې رښتینی سیلاب یې ھغه مھال لاھو کوي کله یې چې ماشومان ( ھلکان او جینکۍ ) ښوونځیو ته د تگ له بنسټیز بشري حق څخه محروم شي!!
زہ د بنگله دیش حکومت ھمدغه نوښت د ھغوی د ټولو نیمگړتیاو سرہ سرہ، ډیرہ سترہ لاسته راوړنه او پخپل ملت زړہ سوځاوی بولم، نو ځکه یې د چارواکو فراست، پر دین ژورہ پوھه او حب الوطني ستایم او په لوړ آواز وایم:
بنگله دیشه! ستا عظمت ته سلام!!
____________________________
حفیظ الدین پیرزادہ
د فبرورۍ ۱۸/ ۲۰۲۴ م
لندن
د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه
د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :
Support Dawat Media Center
If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320
Comments are closed.