کرونا: په کور کي څنګه له ناروغه کېدو ځان وساتو؟ ـ انځوريز راپور

زياتو هيوادونو له ناروغۍ څخه د خپل ولس د ژغولو له پاره خلک تر کوره محدوده کړي دي. خو که څوک پام ونه کړي نو په کور کي په نورو ناروغيو اخته کيدلای سي چي د مخنيوي له پاره يې څو سپارښتني دلته لوستلای سئ:

متوازنه غذا وخورئ

د کويد ۱۹ نوي کرونا ويروس ضد د واکسين جوړېدنه ښايي لا زيات وخت ونيسي. تر هغه وخت پوري مهمه ده چي ستاسو جسم روغ او د ممکنه ناروغيو په وړاندي پياوړی وي. له دې کبله داسي متوازنه غذا خوړل په کار دي چي پکښي ويټامن او نور ضروري اجزا موجود وي لکه تازه سبزيجات، مېوې. کم غوړ او کم خواږه خوړل به ګټور وي.

ښه خوب وکړئ

په کافي اندازه خوب کول د ناروغيو په وړاندي زموږ د بدن د دفاعي نظام د پياوړتيا سبب ګرځي. چي انسان هرڅومره کم خوب کوي، هومره ژر ناروغه کيدلای سي. هغه کسان چي شپه او ورځ تر اندازې زيات د کرونا په تړاو منفي خبرونه لولي او ورڅخه رنج وړي، نو دغه فشار يې ښايي خوب کم يا ناکافي کړي. خوب ته تر تلو دوه ساعته مخکي لا د ټولو رسنيو او تليفونو سره د خدای په امانی وکړئ.

ورزش وکړئ

سپورټ او ورزش زموږ په بدن کي د داسو موادو د جوړېدو لامل کيږي چي موږ خوشاله کوي او موږ ځانونه ښه احساسوو او ښه خوب کوو. سپورټ څوک په کور کي هم کولای سي. د انټرنټ له لاري، له باوري منابعوڅخه ورزشي تمرينونه زده کولای او سهار، ماپښين او ماښام يې لس لس دقيقې تر سره کولای سئ.

د ملګرو او کورنۍ سره د زړه خواله وکړه

د کرونا د ګواښ له کبله څوک بايد خپل ټولنيز تماسونه بند کړي. خو په ډيجيتل توګه څوک د خپلو ملګرو سره په تماس کي پاته کيدلای سي. هره ورځ د ويډيو چېټ له لاري د خپلوانو او دوستانو سره د زړه خواله کولای سئ. دا ډول تماس نيونه د يوازيتوب احساس کموي چي په زياته رواني روغتيا ته ګواښ پېښولای سي.

ځان مصروف وساتئ

بې مضموني او بې کاري د نفستنګۍ يا دغت سبب ګرځي او دغت هم په زياته په رواني روغتيا منفي اغېز لرلای سي. له دې کبله ځان ته په کور کي مصروفيت ولټوئ، له کوره کار وکړئ، کاردستي وکړئ، نوې مشغله پېل کړئ، کتاب ولولئ، پخلی زده کړئ يا په ګډه د کور کارونه وکړئ.

فکر متمرکز کړئ

په کور کي د زيات وخت پاته کېدو پر وخت مهمه ده، چي څوک مثبت فکر وکړي او ځان له وارخطايي څخه ليري وساتي. د ترافيک د کمېدو له کبله د طبعيت نورو ږغونو ته غوږ ونيسئ او فکرونو ته مو تمرکز ورکړئ. ميديټېشن او ديني عبادت هم د اعصابو د آرامېدو او په دې توګه د روغتيا له پاره ګټور ثابتېدلای سي.

وخت مو منسجم کړئ

هغه کسان چي هره ورځ و کار ته د تلو سره عادت وي، ورته په کور کي زيات وخت پاته کېدل مشکل کار وي. ځان له کسلت او بېکارۍ وساتئ او هره ورځ مو پلان او طرحه کړئ او بېکاره يې مه تېروئ. د بيدېدو، خوراک او چښاک او په همدې راز د حرکت او سپورټ ورځني وختونه مو طرحه او عملي کړئ.

له درواغو خبرونو څخه ځان وساتئ

په کور کي د قرنطين په وخت کي زيات کسان خواله رسنيو او انټرنټ ته زيات وخت ورکوي. خو په تيرو ورځو کي څرګنده سوې چي د کرونا په هکله زيات درواغ او اختراع سوي خبرونه هم په ګردش کي دي. ځان له دغو درواغو خبرونو وساتئ. که څوک د وتس اپ يا بلې لاري درته خبر ولېږي نو په ګوګل کي پسي لټون وکړئ او صرف پر اعتباري منابعو باور وکړئ. که خبر درواغ وي نو نور هم په خبر کړئ.