نیژدې لس میلیونه زده کوونکي له نامالوم برخلیک سره مخ دي

په افغانستان کې نیژدې لس میلیونه زده کوونکي له نامالوم برخلیک سره مخ دي.

د پوهنې وزارت له یوې میاشتې را په دیخوا د رادیو او تلویزیون له لارې د تدریس د پیلولو خبره کوي، خو لاهم په رسمي توګه دا چاره نه ده پيل شوې.

له هغه وروسته چې د کرونا ویروس هیواد ته راننوت د ټولو ښوونځیو دروازې د زده کوونکو پرمخ وتړل شوې.

د پوهنې وزارت که څه هم ټینګار کړی چې ستونزه به په فرصت بدله کړې او زده کوونکو ته به د تلویزیون او رادیو له لارې د زده کړې بهیر پیل کړي، خو لاهم نه دی پیل شوی.

د تعلیمي کال نیژدې دوې میاشتې پورې کیږي خو زده کوونکي له ښوونځي بی برخې دي.

یو شمېر زده کوونکي وایي د تلویزیون او رادیو له لارې زده کړې ممکنې نه دي او ډېر لږ کسان ورته لاس رسی لري، خو دا بهیر هم لا نه دی پیل شوی.

ښوونکي وایي د تلویزیون او رادیو له لارې تدریس په هیڅ صورت نشي کولای د ښوونیز نصاب تشه ډکه کړي، خو کیدای شي یو ښوونیز فرصت وبلل شي.

 د پوهنې وزارت وایي د ښوونیزو برنامو عملي کار جریان لري او هره ورځ د پوهنې په تلویزیون او ترکیې د معارف په ستودیو ګانو کې د ساینسي مضمونونه اویا فلمونه چمتو کیږي.

د پوهنې وزارت ویاند نوریه نزهت وایي : چې کله بشپړ شول د ولایتونو د پوهنې ریاستونو ته به وسپارل شي.

د پوهنې د چارو متخصصین وایي وزارت باید دا برنامه که عملي کوي هم پراخه کړي چې ډېر کسان ترې برخمن شي او په دې برخه کې له  نړیوالو مرسته وغواړي.