امنیت شورا: طالبان د سولې مخالف دي، قصدآ روغتیايي مراکز په نښه کوي

 د افغانستان امنیت شورا د یوناما له لوري خپور شوي وروستي راپور ته په غبرګون کې ویلي، د طالبانو لخوا له روغتونونو او کلینیکونو جنګي ګټه اخستنه او له همدې ځایونه پر دولتي ځواکونو بریدونه ددې باعث شوي، چې روغتیايي مراکزو او کارکوونکو ته یې زیان ورسېږي.

 امنیت شورا خبرپاڼه کې راغلي، دا ټولو ته معلومه ده، چې افغان روغتیا پالان په خورا سختو شرایطو کې د انسان ژغورنې ډېره حساسه او مقدسه وظیفه مخته وړي. ددې برخې کارکوونکي د تقدیر وړ دي، باید له هر ډول بریدونو خوندي وي او پر وړاندې یې هر ډول تېری وغندل شي.

خبرپاڼه کاږي، وسلوالو طالبانو د اوربند لپاره د افغانستان د اسلامي جمهوري دولت او د ملګرو ملتونو د عمومي منشي غوښتنې هم رد کړې او دا ددې باعث شوې، چې د کرونا په ډول د عاجلو حالاتو پر مهال هم ډېرو اړمنو خلکو ته خورا ضروري روغتیايي خدمات ونه رسېږي.

د خبرپاڼې پر اساس، د افغانانو او مسلمانانو خلاف د طالبانو روان تاوتریخوالی د افغانستان د ټولو خلکو ژوند او په هیواد کې شته فرصتونه او خدمات له خنډ او ځنډ سره مخ کړي دي. طالبانو نه یوازې چې د جنګ او تاوتریخوالي د پای ته رسېدو لپاره د افغانانو او نړیوالې ټولنې غوښتنو ته اعتنا نه ده کړې، بلکې په قصدي ډول یې د روغتیايي او نورو عامه خدماتو وړاندې کوونکي نهادونه او کارکوونکي یې هدف ګرځولي دي.