اوربند د خبرو اساس جوړوي

د افغان حکومت او طالبانو ترمنځ د مخامخ خبرو پيل غونډه کې بهرنیو هېوادونو استازو اوربند باندې ټینګار وکړ.

پر اوربند ځکه افغانان او بهرني هېوادونه ټینګار لري چې کولی شي دا پروسه بریا ته ورسوي او باور رامنځ ته شي.

د بهرنیو هېوادونو اندیښنه دا ده چې جګړه او تاوتریخوالی هرکله کولی شي چې د سولې مخامخ خبرې له ګواښ سره مخ کړي، نو ځکه د ټولو هېوادونو د استازو ویناوو کې اوربند باندې ټینګار شوی دی.

ناټو، ملګرو ملتونو، امریکا او نورو هېوادونو غوښتنه وکړه چې تاوتریخوالی باید پای ته ورسیږي او هیڅوک دې په هیڅ پلمه نه وژل کیږي.

د بین الافغاني خبرو له پيل سره په ټول افغانستان کې د خلکو تمه ده چې سرتاسري اوربند به رامنځ ته او جګړه به پای ته ورسوي.

د خلکو ټینګار ځکه په اوربند دی چې همدا خلک د دې جګړې قربانیان دي او ویره لري چې که د خبرو پرمهال وینه تویدنه جریان ولري، د خلکو باور به د سولې په مخامخ مذاکراتو باندې له منځه لاړ شي.

خلک د سولې خبرو ته د اوربند له لیدلوري ګوري او چې د سولې خبرو کې اوربند نه وي، دا خبرې د خلکو لپاره هیڅ دلچسپه نه دي.

که موږ خپل د اسلام تاریخ ته وګورو، ټولو جګړو پرمهال لومړی اوربند شوی او بیا مذاکرات شوي، کله چې مذاکراتو پایله نه ده ورکړې، بیا جګړه پيل شوې، خو د مذاکراتو په جریان کې هیڅ داسې مثال نشته چې جګړه دې دوام ولري.

ما د بین الافغاني خبرو په ماښام ځینې رسنۍ تعقیب کړي، اکثریت رسنیو چې  د قطر د غونډې په تړاو عام افغانان غږولي و، ټولو په یو غږ غوښتنه کوله چې اوس مخامخ خبرې پيل شوې، جګړې دې ودریږي او ښکیلې غاړې دې یوې هوکړې ته ورسیږي.

خلک په دې باور دي چې جګړه هیڅ ګټونکی نه لري او سوله کې به ټول اتلان شي، نو اړتیا ده چې د جګړې پر ځای سوله باندې تمرکز وشي او هغه پلانونه، سوچ، فکر او انرژي چې نن په جګړې مصرف کیږي، باید پر سوله مصرف شي.

افغانان له جګړو سخت ستړي شوي، څو نسله یې جګړه کې رالوی شول، ان یو نسل یې سپین ږیری او بل نسل جګړې ته په دننه کیدو بلوغ ته رسیږي، خو جګړې اور کم نه شو او د هرې ورځې په پرتله زیاتیږي.

طالبان مجبور دي چې د افغانانو او نړیوالو دا غوښتنه چې اوربند دی، ومني، طالبانو جګړه د څه لپاره کوله؟ که یې د سولې او متحد افغانستان لپاره کوله، خو هغه دی په میز دې مطرح کړي.

که طالبان جګړه د تاوتریخوالي د دوام او امارت لپاره کوي، نو بیا د سولې خبرې د څه لپاره کوي.

ځکه نه خلک اسلامي امارت غواړي او نه د تاوتریخوالي دوام، یواځې افغانان نه دي چې اسلامي امارت سره مخالف دي، بلکې سیمه او نړۍ هم په ښکاره له دې سره مخالفت لري.