تخار کې د حکمتیار او عطامحمد نور د ملیشو پر لاس روان جنایت

راپور

د تخار اوسيدونکي وايي چې په دغه ولايت کې پر سياسي ګوندونو پورې له تړاو لرونکو مليشو او نامسووله وسله‌والو تر پوزې راغلي دي.
دوی زياتوي، دغه مليشې چې د حزب اسلامي مشر ګلبدين حکمتيار او د اسلامي جمعيت ګوند د اجرائيه رئيس عطاءمحمد نورو له لوري يې ملاتړ کېږي، له خلکو باج اخلي او په خپلو سيمو کې د بشر ضد جرایم ترسره کوي.
د تخار اوسيدونکي له سيحون نيوز سره په خبرو کې ويلي، دغه مليشې د ياد ولايت په رستاق او چاه اب ولسواليو کې فعاليت کوي او د خلکو پر ځورولو او زورزياتي سربېره په قاچاق، زورواکۍ او ان وخت ناوخت پخپل سر ځايي اوسېدونکي محکمه کوي.
دغه راز د ځينو سرچېنو له لوري سيحون نيوز ته را رسېدلي مالومات ښيي چې په دې سيمو کې بشير قانط، عبدالله ګارد او يو شمېر نور افراد د قومندانانو په توګه د دغو مليشوفعاليتونه تنظيموي.
د سرچينو د مالوماتو له مخې دغه قومندانان د ځينو سياسي ګوندونو او د ولسي جرګې د يو شمېر هغو غړيو له ملاتړ برخمند دي چې پر ګوندونو پورې تړاو لري.
په ولسي جرګه کې د تخار د خلکو استازی حميدالدين يولداش هم له سيحون نيوز سره په خبرو کې د مليشو موجوديت تائيدوي او زياتوي چې په روستاق او چااب کې د سياسي ګوندونو دې وسله‌والو مليشو د خلکو ستونزې زياتې کړي دي.
نوموړی وايي، د يادو وسله‌والو مليشو تر شا ولاړ ګوندونه په دې دواړو ولسواليوکې خپلو مليشو ته نظامي امکانات په واک کې ورکوي او زياتوي چې د دوی تر حکم لاندې مليشې بيا د خپلې خوښې راج پر خلکو چلوي. يولداش دا هم مني چې په روستاق او چااب کې عمده مليشې پر حزب اسلامي او دغه راز د جمعيت اسلامي ګوند پر اجرائيه رئيس عطاءمحمد نور پورې تړلي دي.
په همدې حال کې د تخار د والي وياند جواد هجري هم له سيحون نيوز سره په ټليفوني خبرو کې د سياسي ګوندونو له لوري د مليشو ملاتړ تائيدوي خو وايي چې دغه مليشې تر دې حده نه دي چې د حکومت حاکميت وننګوي. هجري ډاډ ورکوي چې حکومت په تخار کې د حزب اسلامي او اسلامي جمعيت ګوند د مليشو له منځه وړلو ته ژمن دی او په خبره يې د يادو مليشو هر ډول خپلسرو فعاليتونو مخه به نيسي. نوموړي دغه راز دا هم وايي چې د روستاق يو شمېر برخې د ګوندونو له لوري د جوړو شويو مليشو د فعاليتونو له کبله ناامنه شوي هم دي.
هجري زياتوي چې دا امني له دې کبله رامنځته شوي چې د ګوندونو دغه نيابتي مليشې خپلمنځي ستونزې او اختلاف لري چې په خبره يې وخت وخت د همدې ستونزو له کبله په خپل منځ کې وسله‌والې جګړې هم کوي. نوموړی وايي، د يادو ستونزو مخنيوي او څېړلو په هدف ۹ځله باصلاحيته پلاوي له کابل تخار ته ورغلی خو په خبره يې تر دې مهاله په تخار کې د مليشو له امله رامنځته شوې ستونزې اوس هم پر ځای دي.
هڅه مو وکړه چې په دې اړه د ګلبدين حکمتيار او عطاءمحمد نور نظر هم واخلو خو له هڅو سره سره پرې ونه توانېدو.

سیحون خبري آژانس