د نړیوالو دوامداره ملاتړ ډاډ

که څه هم طالبان په دې فکر دي چې بهرني ځواکونه له افغانستان وځي او دوی به بیا د اسلام اباد په زور کابل ونیسي، خو له دې ناخبره دي چې نړۍ له افغان حکومت سره ده او په هیڅ ډول طالبانیزم ته اجازه نه ورکوي.

که طالبانو له امریکا سره هوکړه کړې، دا د فتحې په مانا نه ده بلکې طالبان زیاتو برخو کې داسې تړل شوي چې نه شي کولی خپلو وسله والو باندې هغه مادې تطبیق کړي.

مثلا طالبانو له امریکا سره هوکړه کړې چې بهرنیو ترهګرو ډلو په ځانګړې ډول القاعده ډلې سره به اړیکې پرې کوي، خو د طالبانو جنګي قومندانان همدا اوس دا ډلې تر خپل سیورې لاندې ساتي او پراخ امکانات ترې ترلاسه کوي.

که چیرې طالبان له القاعده ډلې سره اړیکې پرې کوي، د جنګي قومندانانو قناعت څنګه ترلاسه کوي چې اسلام کې خو سرحد نشته او بیا ولې طالبانو د یو اسامه لپاره ټول ريژيم په امریکا باندې ړنګ کړ.

دغه راز طالبانو له امریکا سره هوکړه کړې چې د امریکا ګټې به افغانستان کې خوندی کوي، خو جنګی طالبان ورسره دا ځکه نه مني چې امریکا خپل دښمن ګڼي او د امریکا دښمنان خپل دوستان.

طالبانو امریکا ته دا ډاډ ورکړی او تضمین به هم ورکوي چې په افغانستان کې به لکه د امریکا د ملیشو د امریکا ګټې خوندي کوي.

دغه راز طالبانو سره هوکړه کې منل شوې چې طالبان به بیا امارت نه قایم کوي، یو ګډ حکومت به جوړوي چې ټول افغانان پکې وي، دا حکومت به داسې نه وي لکه د طالبانو بلکې داسې حکومت به وي چې ټول پکې ځانونه وګوري او حقونه یې پکې خوندي وي.

خو د طالبانو جنګي ډلې هیڅکله تیارې نه دي چې له دومره اوږدې جګړې او ورانکاریو ګډ حکومت کې ورشریک شي.

له طالب قومندانانو سره اندیښنه دا ده چې دوی او وسله وال به یې کومو برخو کې جذب کیږي چې نه زده کړې لري او نه نظامي تعلیم.

ګډ حکومت کې د طالبانو نظامي کسان هیڅ خپل ځان نه ګوري، یواځې دا چې ټول نظام ورته وسپارل شي او بیا یې لونګۍ له سر تړلې او دوه سیټه ډاټسنو کې سپاره په ښکاره نعتونه او پتې سندرې اوري.

نو له همدې کبله د افغان حکومت ټینګار دا دی چې د امریکا او طالبانو ترمنځ هوکړې دې بیا و ارزول شي چې څنګه د سولې ټول اړخونه دقیق کولی شي چې دوامداره او باعزته سوله وي، داسې سوله چې جګړه پای ته ورسوي.

امریکا د افغان حکومت سره د یو شریک په توګه هیڅکله تیاره نه ده چې یوه داسې پریکړه وکړي چې شل کلنه جګړه بې پایلې شي، امریکا به بامسوولیته وځي، داسې به وځي چې افغانستان کې سرتاسري سوله راغلي وي، کنه بیا د امریکا شل کلن حضور د څه لپاره چې طالبان پکې بیا واک ته رسیږي.