زرغون لغمان، د تازه سبو پلازمېنه

لغمان؛ د افغانستان په ختیځ کې پروت هغه ولایت، چې معتدلې هوا، مناسب جغرافیوي موقیعت پریمانه اوبو او شنې ساحې یې ښکلا دوه برابره کړې.
د لغمان اوسېدونکي اکثره په کرهڼې بوخت دی او د خپل ژوند د ورځنیو چارو لګښت له همدې لارې پوره کوي.
لغمان د هېواد هغه زراعتي ولایت دی، چې سابه یې نږدې ټول افغانستان ته انتقالیږي؛ نو ځکه یې د سبو د پلازمېنې نوم هم خپل کړی.
بېنډۍ، رومي بانجان، تور بانجان، بادرنګ، کدو، کدوګک، پالک، پیاز، کچالو، ګندنه، ګلپي، کرم، کاهو، شلغم، سره او سپینه ملی، ترایي، تره او یوشمېر نوره ترکارۍ د هغو سبو له ډلې څخه دي، چې په یاد ولایت کې یې کښت ډېر دی.
اوس مهال په  لغمان کې د سبو راټولولو ۱۵ مرکزونه فعالیت لري، چې شاوخوا لس زره کسان پکې په کار بوخت دي.
د لغمان د کرنې او مالدارۍ ریئس محمد جمیل خوشال وايي، چې  هڅه کوي په لغمان کې بزګرانو ته د دودیزې کرکېلې ترڅنګ د سبو د کرلو نوې او ګټورې لارې چارې ور وښيي.
نوموړی زیاتوي، چې د یاد ولایت په مرکز او قرغیو ولسوالۍ کې بزګرانو ته ۳۱۹ بابه شنې خونې جوړې شوي، چې د تازه سبو په تولید کې یې مهم رول لوبولی دی.
بل پلو بیا کروندګر هم خوښ دي او وايي، چې د کال په څلورو فصلونو کې یې حاصل ښه نتیجه ورکوي، چې دې چارې یې اقتصادي وده هم چټکه کړې.