امریکا: طالبان باید دایمي اوربند وکړي

امریکا افغانستان کې د جګړې د ژر بندېدو غوښتونکې ده او طالبان باید افغانستان کې دایمي اوربند وکړي.
د امریکا د بهرنیو چارو وزارت ویاند “نید پرایس” په یو خبري کنفرانس کې ویلي، چې امریکا د طالبانو له لوري د اوربند هرکلی کوی؛ خو له طالبانو غواړي، چې افغانستان کې دې خپلې جګړې بس او یو دایمي اوربند وکړي.
نوموړي همدا راز زیاته کړې، چې طالبان باید د سولې روانو خبرو کې هم جدي اقدامات ترسره، جګړه بس او د ولس پر وړاندې خپل مسؤلیت ادا کړي.
پرایس د امریکایي ځواکونو وتلو ته په اشارې ویلي، چې له افغانستان څخه د امریکایي ځواکونو وتل له یاد هېواد سره د امریکا د همکاریو د پرېکون په مانا نه دي؛ بلکې د دواړو لوریو ترمنځ به د اړیکو یو غښتلی ور پرانیستل کیږي.
که څه هم طالبانو د کوچني اختر په درې ورځو کې له افغان حکومت سره اوربند اعلان کړ؛ خو د خلکو له لوري یې د تېر په څېر تود هرکلی ونشو.
عام باور دا دی، چې په وروستیو دوه اونیو کې طالبان د افغان ځواکونو له لوري سخت ځپل شوي او دا ډله د خپلو جنګیالیو د پوره کولو لپاره د یو داسې فرصت په تمه ده، چې له افغان حکومت سره په کې د جګړې په ډګر کې ښکېل نه وي.