روژتۍ لنډۍ -۸

لنډۍ، د ثبتولو ستونزه

یو سلواته ویشتمه برخه

اتمه برخه

 

د روژې شل ورځې شوې تېرې

دغه لس نورې به یې څه راپېښوینه

 

که سروکال ټوله روژه وای

زما د یار دیدن به نه و په عمرونه

 

چې لوږه راغله ټول روژه شول

چې خواړه نه وي، څه روزه څه بوزه وینه

د روژتیو لنډیو په لړ کې مې دا ځل بیا هم څو داسې نوې لنډۍ راټولې کړې دي چې په روژې پورې اړه لري:

روژه راغلې، مېلمنه ده

عزت بې وکړو، که لرو که نه لرونه

 

روژه منو حکم د خدای دی

خو د ظالمو خلکو نه منو امرونه

 

سږ تر پروسږ حال بدتر دی

د سږنۍ روژې په شک دي ثوابونه

 

وطن خو ټول اپت وهلی

گمان مې نه شي سږ روژه به سمه وینه

 

چې گنهکار نه شمه خلکو

سږ د روژې په باب شکمن دي ډېر فکرونه

 

بېکاري لوږه دواړه راغلل

له دغو دواړو به روژه څه خیر کوینه

 

که نصیبونه په ریښتیا وي

زموږ نصیب کې بې روژه لیکلې وینه

 

د روژې شل ورځې شوې تېرې

دغه لس نورې به یې څه راپېښوینه

 

روژې ته ډېر خلک خوشحال وي

ښکاره خوشحال وي، وايي دا چې کله ځينه

 

که سروکال ټوله روژه وای

زما د یار دیدن به نه و په عمرونه

 

په لوږې چا شکر ایستلی

زما ده سروکال روژه شکر کومه

 

اخر کې ډکی ورنه جوړ شي

چې په نهاره هره ورځ څوک روژه وینه

 

روژه به تېره شي جانانه

د تا نازونه مې په هرسات زوروینه

 

روژه په خوله به درته راشم

خو ستا نازونه مې هرڅه خرابوینه

 

روژه به وي او که به نه وي

د روژتیو تمثیل هریو ښه کوینه

 

چې لوږه راغله ټول روژه شول

چې خواړه نه وي، څه روزه څه بوزه وینه

 

اسره مې خدای ته وه بیا تا ته

غوټه روژه کې دې راکړي ځوابونه

 

پر ما دې سمه ورځ تیاره کړه

سمه روژه کې دې چې راکړل ځوابونه

 

 

اخر روژه پسې اختر دی

د دیدنونو وار به راشي سیل به وینه

 

د خولگۍ نه یې راته ووې

چې روژه خلاصه شي بیا څه ځواب کوینه