په نړیوالو څېړنیزو ژورنالونو کې د څېړنیزې مقالې چوکاټ

په نړیوالو څېړنیزو ژورنالونو کې د څېړنیزې مقالې چوکاټ:

څېړنیزه مقاله په یوه ځانګړي او منلي فارمټ کې د یوې ترسره شوې حقیقي څېړنې ارایه کولو ته وایي. په عمومي ډول یوه څېړنیزه مقاله لاندې برخې لري:

１. لنډیز (Abstract)

د مقالې په دې برخه کې د ترسره شوې څېړنې لنډیز، موخې، میتود او پایلې په لنډ ډول لیکل کېږي.

２. پېژندنه (Introduction)

په دې برخه کې د څېړنې د موضوع په تړاو عمومي مالومات وړاندې کېږي او وروسته بیا د څېړنې د موضوع په تړاو د نورو څېړونکو د څېړنو ذکر هم کېږي، چې دې برخه ته یې Literature Review ویل کېږي. باید ووایو چې تقریبا په ټولو نړیوالو ژورنالونو کې Literature Review د مقالې د پېژندنې (Introduction) په برخه کې راوړل کېږي.

３. کړنلاره (Method)

په دې برخه کې د څېړنې د ترسراوي د کړنلارې په اړه بشپړ مالومات وړاندې کېږي، همدارنګه د ترلاسه شوې ډیټا ادرسونه، د ډیټا تحلیل او کړنلاره وړاندې کېږي.

４. پایلې (Results)

په دې برخه کې د څېړنې د ترسراوي وروسته په لاس راغلې مهمې پاېلې/پاېله لیکل کېږي. په دې برخه کې معمولا جدولونه، شکلونه او احصایوي مالومات هم ځاې په ځاې کېږي.

５. بحث (Discussion)

په دې برخه کې د ترسره شوې څېړنې په پایله کې لاسته ته راغلې اساسي موندنې تشریح کېږي او د ډیټا او تېرو څېړنو (Literatures) سره یې اړیکه روښانه کېږي.

６. عمومي پایله (Conclusion)

په دې برخه کې د ترسره شوې څیړنې د اساسي موندونو لنډیز لیکل کېږي. همدارنګه د څېړونکي پیشنهادات (Suggestions) او د څیړنې محدودیتونه (Limitations) هم ځاې په ځاې کېږي.

７. اخځلیکونه (References)

په دې برخه کې د هغو ماخذونو ذکر کېږي، چې په ترسره شوې څېړنه کې ترې ګټه اخیستل شوې وي. باید ووایو چې دا برخه د مقالې په بېلابېلو برخو کې د ځاې پر ځاې شویو Citations سره لینک ولري او د Citation د ځاې پر ځاې کولو لپاره باید له بېلابېلو انلاین اپلکیشنونو څخه ګټه واخیستل شي، چې له ډلې یې Zotero ډېر اسانه او معیاري دی.

هغوې چې په خپلو مسلکي برخو کې د څېړنې کولو ته لیوالتیا لري او غواړي چې څېړنیزه مقاله یې په نړیوالو ژورنالونو کې خپره شي، نو پورته ذکر شوی چوکاټ تقریبا د ټولو نړیوالو ژورنالونو لپاره دی. هڅه وکړئ! هیڅ کار ناممکن نه دی.

نوټ: د انګلیسي ژبې زده کړه د نننۍ نړۍ یو له ډېرو مهمو اړتیاو څخه دی.