افغانه پيغله

 زه چې ښوونځي ته ځمه
هلته رڼا زده کوم
زه پېژنده د ځان
بل د الله زده کوم
دين باندې ځان پوهوم
پنځه بناه زده کوم
قدر د مور زده کوم
حق د بابا زده کوم
چې پيغمبر مو څوک و؟
هلته به دا زده کوم
چې په قرآن پوهه شم
الف، با، تا زده کوم

زه چې ښوونځي ته ځمه
غواړمه پوهه شمه
چې کليمه څه معنا؟
لمونځ هم را زده کړي راته
بل دا روژه څه معنا؟
په ذکات پوهه شمه
حج فريضه څه معنا؟
شرط د نکاح زده کړمه
دا وليمه څه معنا؟
ايمان په څو قسمه ده؟
دا عقيده څه معنا؟
چې خلک ودرېږي ورته
دغه کعبه څه معنا؟
اودس، قيام او رکوع
بل دا سجده څه معنا؟

زه چې ښوونځي ته ځمه
غواړمه پوهه شمه
چې بارانونه کوي
دا ميکايل څوک و؟
روح چې له خلکو اخلي
دا عزرائیل څوک و؟
چې يې راوړله وحي
دا جبراييل څوک و؟
چې به شپيلۍ غږوي
دا اسرافيل څوک و؟
يوسف، داوود، ابراهيم
او اسماعيل څوک و؟
چې ادم وپيژنم
هابیل، قابيل څوک و؟
فرعون، نمرود، آبرهه
شيطان ذليل څوک و؟

زه چې ښوونځي ته ځمه
جار له نامو يې شمه
هر يو کتاب اسلامي
زموږ پوښتنې شرعي
هر يو جواب اسلامي
زمونږ فرهنګ افغاني
زمونږ حجاب اسلامي
هلته، ښوونه د دين
هلته هر باب اسلامي
زمونږ ښوونکې مونږ ته
کوي خطاب اسلامي
وي چاپيريال اسلامي
وي مو نصاب اسلامي

زه چې ښوونځي ته ځمه
د وخت حاکمه واوره
زه به عالمه شمه
ښه بد به وپېژنم
بيا به معلمه شمه
د چا علاج به وکړم
زه به ډاکټره شمه
د چا به کور اباد کړم
چې انجينره شمه
چې شم ښوونځي ته لاړه
نو قابيله به شمه
که چېرته لاړه نه شم
تش عاقله به شمه
نور درته سوال کومه
مونږ جهالت نه غواړو
زمونږ ښوونځي پرانېزه
زمونږ ښوونځي پرانېزه