د غږ غلط کارول

د غږ غلط کارول یا Vocal abuse:
بې مورده ډېر غږیدل یا په لوړ اواز غږیدل د انسانانو حنجرې ته زیان رسوي او د غږ د خرابوالي لامل کیږي چې دې چارې ته د غږ غلط کارول یا Vocal abuse وایي. انساني حنجره په عادي تکلم سره هیڅ کومه ستونزه نه پیدا کوي خو که چیرې ورځنۍ خبرې اترې له حده زیاتې شي او یا هم ډېر وخت لپاره په لوړ غږ څوک خبرې کوي په حنجره کې صوتي حبول فشار لاندې راځي پړسوب پیدا کوي او د غږ د ستړي کیدو او خرابیدو لامل کیږي. د غږ غلط کارول اکثره مسلکي منشا لري، لکه قاریان، ښوونکي، سندرغاړي …
ځینې نور عادتونه هم حنجره خرابوي لکه د ستوني تکراري صفا کول (hawking)، سګرټ څکل، مزمن ټوخی او ګردجن چاپیرال.
که یاد اسباب د لنډې مودې لپاره وي د غږ په استراحت، وچې غاړې ته د ګرم بخاراتو کش کولو (steam inhalation) او مایعاتو اخیستلو سره حنجره نارمل کیږي خو که پورته لاملونه د ډېرې مودې لپاره شتون ولري په حنجره کې د غوټو، غوښو او پولیپونو پیدا کیدو لامل کيږي چې بیا جراحي مداخلې ته اړتیا پیدا کوي. ممکن ځینو پیښو کې مزمن تغیرات په سرطاني تغیراتو بدلون ومومي چې د شدیدو روغتیایي ستونزو لامل کیږي.
کوښښ وکړئ د ژوند ټولې چارې په نارمل حدودو کې ترسره کړئ ترڅو له ډول ډول ناروغتیاوو خوندي اوسئ.