په آلمان کې د یوه افغان مهاجر د برياليتوب راز

رامین ۳۴ کلن دی، هغه په افغانستان کي انګلیسي ژبه لوستې وه، هیڅ فکر يې نه کاوه، چي یوه ورځ به په خارج کي ډونر خرڅوي، خو نوموړی برخلیک دلته راوست او اوس له خپل کار څخه خوښ بریښي.

د کډوالۍ پرېکړه

رامن په افغانستان کي د انګلیسي ژبي ښوونکی و، وروسته هغه د کورنیو چارو وزارت په ملکي برخه کي د ژباړن په حیث کار کاوه. کوم وخت چي رامین له افغانستان څخه کډوال کیدی ۲۴ کلن و او په افغانستان کي يې خپل راتلونکی نه لیدی، د رامین په خبره: «زموږ په هیواد افغانستان کي، چي هرڅومره خواري او زحمت وکاږې څوک دي کار ته په درنه سترګه نه ګوري.»

نوموړي په ۲۰۱۳م کال کي پرېکړه وکړه، چي خپل ټاټوبی پرېږدي، د ده موخه آلمان و. رامین له ډېرو ستونزو ګاللو وروسته د ۲۰۱۳م کال په وروستیو کي آلمان ته راغلی او د پنا اخیستلو غوښتنلیک يې ورکړ.

دغه کډوال ځوان په آلمان کي ډېري ستونزي ګاللي دي، که څه هم ده په انګلیسي ښې خبري کولای سوای، خو باید آلماني ژبه يې زده کړې وای، د الماني ژبي زده کړه المان ته د نویو راغلیو کډوالو له پاره په ټولنه کي د ادغام له پاره د بریالیتوب یو رمز دی.

پلان جوړونه، د بریالیتوب کیلي

رامین وايي، که چیري څوک په آلمان کي بریالیتوب پلټي، «باید د خپل ژوند د هري ثانیې، هر ساعت او هري ورځي له پاره یو منظم پلان او برنامه ولري.» رامین د دې له پاره، چي په آلمان کي باوري اسناد ولري، په ۲۰۱۵م کال يې د هوټل دارۍ په مسلکي رشته کي زده کړه پیل کړه، نوموړي د دې دورې د پای ته رسولو سره سم دوه کاله په یو رسټورانټ کي کار وکړ.

په دې وروستۍ لسیزه کي یو زیات شمیرو افغان ځوانان د بېکارۍ او ناامنۍ له امله هیواد پرېښولو ته اړ سوي دي. دغه افغان ځوان وايي، مسلکي زده کړه د دغو ځوانانو له پاره د کار په بازار کي ډېره مهمه ده: «دلته، چي هر کار وغواړي زمینه يې چمتو ده، نو هرځوان ته ښايي، چي خپل ځان په یوه رشته یا کار کي مسلکي کړې.»

نوموړي د ۲۰۲۰م کال په وروستیو کي پرېکړه وکړه، چي خپل ځان ته یو شخصي کار جوړ کړي، نو یو ډونر پلورنځی يې پرانیست. دغه کار چندان اسان نه و، خو ده په زغم سره وکولای سوای، چي په خپل دغه نوی کار کي بریالی سي.

رامین وايي: «خپل شخصي کار لکه کوچنی، ډېره خواري غواړي، نو که چیري ډېر کار او زحمت ورته وکاږې بریالیتوب مو په برخه کیږي.»

نوموړی اوس په رسټورانټ کي یو څو کار کوونکي لري او غواړی خپل کاروبار ته پراختیا ورکړي. رامین ډېر مشتریان لري. د ده ځیني مشتریان همیشني دي او ځیني نور يې بیا هغه کسان دي، چي د ده له دوکان سره پر سړک تیریږي.

رامین وايي د ډونر په پخولو کي له افغاني داروګانو «مصالحه جاتو» څخه کار اخلي، چي ډونر ته یو ځانګړی خوند ورکوي.

دغه افغان ځوان، چي اوس له خپلي مېرمني او دوو زامنو سره ژوند کوي، په دې اند دی، چي باید له ستونزو سره مبارزه او په عین حال کي د ځان له پاره یو منظم پلان او برنامه هم اړینه ده: «که بریالیتوب غواړې، زحمت به ګالې.»

ژباړه : محمدابراهیم سپېڅلی – دویچه ویله