د چرگانو پښې، ارزانه او له پروتینو ډکه نخسه

تاسې مې اړ کوئ، چې له خپل مسلک پښې وباسم پرون مې د سوپ اړوند پوسټ کړی‌وو (یاد ساتئ، چې هغه سوپ ماته د پسه له یو کېلو غوښې هم گران تمام شوی‌وو). نو مسلمان ملت په‌دې په قار وو، چې ولې دې خوندور سوپ د «چرگانو پر پښو» خراب کړی‌دي؟ ځینو خو يې د «اېېق» او نور بد کلمات هم کارولي‌وو، چې رښتیا يې هم خپه کړم.
***********

ولې د چرگانو پښې؟
ټوله نړۍ مو په ورغوي کې پرته ده، هم‌دا اوس خپل سمارټ‌فون کې پلټنه وکړئ، چې د چرگانو پښو کې کوم پروتین او وېټامین شته دی. ما غوندې یو شخص چې د تېر یو کال راهیسې یې د تقویت په موخه د ډاکټرانو په سپارښتنه بېلابېل ټابلېټ خوړل، د چرگانو پښو له دې درملو خلاص کړم، د چرگانو پښې په‌ځان کې په لږه کچه کالوري، خو په ډېره کچه پروتین لري لکه کلسیم، وسپنه او زېنک، تر څنگ يې نسبت نورو غوښو ته کلسټرول او غوړ هم کم دي.
************

د کومو ستونزو درملنه ده، له ټوکې پرته:
گورئ که ستاسې کوچنیان له پښو او هډونو څخه کمزوري اوسي، یا ستاسې عمرخوړلي والدین یا خپله د هډونو له درده ځورېږئ، نو د چرگانو پښې يې بهترینه نخسه ده، ښايي ډېری ملگري یې په ټوکه واخلي، خو یو وار تجربه يې شرط ده، البته چې اشپز مو لایقه اوسي. حتا په ۲۰۲۲ او ۲۳ز کې د مصر هېواد ډاکټرانو په کراتو-کراتو له خپلو وگړیو غوښتي‌وو، چې د چرگانو له پښو د خپلې روغتیا په موخه گټه پورته کړي، ځکه چې ارزانه، خوندوره او له وېټامینونو او پروتينونو ډکه منبع ده.
***********

د چرگانو پښې او بېلابېل خواړه:
گورئ، کله مو که طبعیت ومنله، چې د چرگانو پښې مې روغتیا او د خولې خوند له‌پاره ښې دی، نو بیا کولای شئ، چې بېلابېل خواړه ترې چمتو کړئ، زما تجربه دا ده، چې بهترینه بڼه يې تف کړې بڼه ده – يانې کله مو چې پښې په گرمو اوبو پاکې او سطحې پوټکی مو ترې لرې کړ، نو دېگ بخار ته یې کړئ، لږږږ غوړي ورواچوئ، مساله پرې وشیندئ، بېخي لږې اوبه واچوئ، او سر پرې لس دقیقو له‌پاره بند کړئ. دوییمه طریقه يې، لعاب کړې‌ده، چې په رومیانو کې يې پخوئ، درېیمه طریقه يې کوچنیانو یا مشرانو خلکو له‌پاره ده، چې یخني يې جوړه کړئ، او اخره طریقه يې په سوپ کې ده. کېدای شي، چې نور ډولونه يې هم پاخه شي، خو ما يې دغه طریقې تجربه کړي‌دي.