د پوستکې لاندې غوړینې غوټې

دې ډول غوټو ته چې په تصویر کې ئي لیدلی شئ ، په طبي ژبه لایپوما lipoma وئیل کېږي .

سبب د انسان د پوستکي لاندي په طبیعي ډول د غوړ یوه طبقه شتون لري . کله ناکله یوه یا څو حجرې د خپل طبیعي نشونما په بهیر کې ، له اندازې ډیره غټیږي . خو دا چې ولې داسې کیږي ، تر اوسه څوک پرې پوه شوي ندي .

دا غوټه یا غوټې څنګه پیژندلی شو

1 – د غوټي اندازه معمولا د 2 سانتي متره په شاو خوا کې وي خو کله هم تر دې کوچنۍ یا ډیره غټه شي . دا غوټه په دوامدار ډول نه لویږي ، یعنی کله چې تاسو داسې یوه غوټه ولیده ، د هغې اندازه تغیر نکوي . دا غوټې درد نلري ، خو که د هغو موقعیت د عصبي ریښې له پاسه واقع شوی وي ، کیدی شي لږ شانتې درد هم ولري .

2 – دا غوټه ډیره کلکه نه وي او د رابر غوندې محسوس شي . که غوټه پخپلو ګوتو باندې د پوستکي لانې و خوځوئ ، د حرکت وړ ده ، معنی دا چې غوټه پر پوټکي او یا نورو انساجو کلکه موښتې نده .

3 – د غوټې د پاسه پوستکې کاملا نارمل وي . دا غوټي کیدی شي د بدن په هرځای کې دننه په ګيده ، د ملا دتیر شاوخوا ، غاړه ، بازو ، مړوند ، ورون او په خلص ډول په هر ځای کې چې غوړ موجود وي ، رامنځ ته کیدای شي ، خو هغه چې د پوستکي لاندې دي ، تاسو ئي لیدلی او لمس کولی شئ . ددې غوټو lipoma شتون د وینې د غوړ سره هیڅ تړاو نلري .

تشخیص ستاسو ډاکټر کولی شي چې دا ډول غوټی په آسانۍ سره وپيژني . خو که شک موجود وي ، دالتراسوند معاینه توصیه کېږي .

درملنه په عمومی ډول دا غوټې lipoma بی خطره دي او درملنه نغواړي . داسې دوا یا ملهم نشته چې دا غوټه له منځه یوسي .

که تاسو د شایست له نظره دداسې غوټو درملنه غواړئ ، نو کیدی شي ستاسو ډاکتر هغه د موضعي بیحسې په مرسته عملیات کړي . په ډیرو اثتثنائي واقعاتو کې دا ډول غوټې دیره نشونما کوي چې د liposarcoma په نامه یادېږي .