په فرانسه کې د ناکراریو دویمه شپه

په فرانسه کې د پنجشنبې په ورځ په پرله پسې توګه د دوهمې شپې له پاره ناکرارۍ رواني وې، چارواکو په زرګونو امنیتي ځواکونه ځای پر ځای کړي ترڅو د لا ډېرو ګډوډيو مخه ونيسي. دغه لاريونونه او ګډوډۍ له هغه وروسته پيل سوې چي یوه پوليس پر يوه ځوان باندي فاير وکړ او هغه ووژل شو.

دغه ۱۷ کلن ځوان د سه شنبې په سهار د پاریس په  یوه څنډه کې د پولیسو له خوا د ډزو په واسطه پر سینه وویشتل سو او مړ سو.

د دغه تنکي ځوان مړینه د چهارشنبې په شپه د پاریس په څو برخو کې د اور اچوونکو موادو سره د نښتو او بریدونو لامل سوه چې په ترڅ کې یې لږ تر لږه ۲۴ پولیس ټپیان سول. د  لاریونونو په لومړۍ شپه ۳۱ کسان ونيول سول.

د چهارشنبه په شپه، لاریونونه په نانتر او د پاریس په لویدیځ یوشمیر نورو سیمو او همدارنګه د دیيون ختیځ ښار، هغه ولسوالۍ کې چې ځوان پکې وژل سوی وو دوام درلود.

د ایسون په سیمه کې، د مسافرینو یوې ډلې یو بس وتښتاوه او بیا یې اور ورته واچاوه. يو شمېر لاريون کوونکو موټرونه هم سوځولي دي.

په تولوز ښار کې موټرونو ته اور واچول سو او پولیسو او اور وژونکو چې وضعیت يې کنټرول کاوه لاریون کوونکو پرې بريد وکړ.

په پاریس او شاوخوا سیمو کې د وضعیت د کنټرول له پاره شاوخوا دوه زره پولیس ګومارل سوي او پولیسو د شپې پر دوه نیمو بجو د ۷۷ کسانو د نیولو اعلان هم  وکړ.

مکرون: د نه بخښلو وړ او نه بخښونکی

پولیسو په پیل کې ویلي ول چې یوه افسر دغه ځوان ځکه په ډزو وواژه چې هغه خپل موټر د افسر پر لور روان کړی و. خو یوه ویډیو په ټولنیزو رسنیو کې خپره سوې او د رویټرز او فرانسې خبري آژانس له خوا تایید سوې ده  چې دوه پولیس افسران ښیې چې د یو دریدلي موټر څنګ ته ولاړ دي او یو یې پخپل ټوپک موټر چلونکي په نښه کوي.

په دې جریان کې، یو ږغ هم اوریدل کیږي چې موټر چلوونکی تهدید سوی، او بیا کله چې موټر ناڅاپه حرکت پیل کړي، پر ډریور باندي په ښکاره ډزې کيږي.

د فرانسې ولسمشر ایمانویل مکرون جنوبي ښار مارسیل ته د یوه رسمي سفر په ترڅ کې د دغه ځوان وژنه «د نه بخښلو وړ او نه بخښونکې» وبلله او ټینګار یې وکړ چې هیڅ شی د یوه ځوان وژنه نه سي توجیه کولای.

د فرانسې لومړۍ وزیرې الیزابیت بورن ومنله چې د پولیسو کړنې «په ښکاره ډول د پولیسو د فعالیتونو له اصولو سره سمون نه خوري.»

د توکمیزو لږکیو سره د پولیسو د چلند په اړه بحث

دې پېښې له هغو خلکو سره چې په کم عاید لرونکو سیمو کې ژوند کوي، په تېره بیا د قومي اقلیتونو له خلکو سره د پولیسو د چلند په اړه بحثونه زیات کړي دي. دې ناکراریو په هیواد کې د تاوتریخجن جرمونو زیاتوالي ته هم پام اړولی دی.

«زما ځوان قرباني ناحل دی». د هغه مور په ټیک ټاک کې د هغه د درناوي له پاره د لاریون غوښتنه کړې وه.

یو ۳۸ کلن پولیس افسر چې دغه ځوان یې په ډزو وژلی، نیول سوی او د وژنې په اړه ترې پلټنې روانې دي. د ناحل وکیل، یاسینه بوزرو ویلي دي چې هغه به د هغه ناسمې شاهدۍ په اړه یو بل شکایت ثبت کړي، چې پر ناحل ادعا سوي وه چي غوښتل یې پوليس په موټر ووهي.

دویچه ویله

**************************************