زلزله ځپلو ته د بیړنۍ درملنې روغتون جوړ شوی

د هرات ولايت د اطلاعاتو او فرهنګ رياست مسوولين وايي، په دغه ولايت کې د زلزله ځپلو د بېړنۍ درملنې لپاره د متحده عربي اماراتو يوه روغتون فعاليت پيل کړى دى.

دوی زیاتوي چې دغه روغتون د متحده عربي اماراتو له خوا په ټولو عصري اسانتیاوو سمبال دی.
د هرات ولايت د اطلاعاتو او فرهنګ رييس احمدالله متقی وايي چې دغه روغتون ته هر ډول درمل راوړل شوي دي.
«په دې روغتون کې د داخله طب، جراحۍ او اطفالو په برخو کې ډاکټران کار کوي او د متحده عربي اماراتو تخنیکي ټیم هم هلته شته کار یې روان دی او په دې روغتون کې ټول امکانات چمتو دي.»
د هرات ولايت روغتيايي مسوولين وايي، په دغه روغتون کې د ټپيانو د درملنې ټول تخصصي خدمات وړاندې کېږي.
د بېړنیو حالاتو د کمېټې غړی محمد اصف کبیر وايي، دغه روغتون په ۸ ساعتونو کې د روغتیايي خدمتونو وړاندې کولو ته چمتو دی.
«روغتون د اړتیا وړ اسانتیاوو، مسلکي پرسونل، متخصصینو او له اړینو تجهیزاتو سره چمتو شوی. تجهیزات لکه د الټراساونډ ماشینونه، ډیجیټل ایکسرې او فلوروسکوپ، او همدارنګه عملیاتي خونه، د خدماتو چمتو کولو لپاره چمتو شوې.»
د هرات والي نوراحمد اسلامجر په دغه ولايت کې د ايمرجنسي روغتون فعاليت يو مهم ګام بولي او له زلزله ځپلو سره پر مرستو ټينګار کوي.
«دوست هېواد متحده عربي اماراتو په هرات ولایت کې د پیاوړو ډاکټرانو او پرمختللو طبي او روغتیايي وسایلو په لرلو سره د دغه ولایت زلزله ځپلو ته د خدمت لپاره یو ایمرجنسي روغتون چمتو کړی دی موږ ورڅخه مننه کوو.»
دغه ایمرجنسي روغتون په داسې حال کې په هرات کې د متحده عربي اماراتو له خوا فعالیت پیلوي چې په څه کم لسو ورځو کې درې زورورې زلزلې هرات او د هغه ګاونډي ولایتونه ولړزول.
د ملګرو ملتونو د راپور له مخې، د دغو زلزلو په پایله کې ۱۵۰۰ کسان وژل شوي او شاوخوا دوه زره نور ټپیان شوي دي.

کلید رادیو