اېکس به د روان کال تر پایه ۷۵ میلیونه ډالر عواید له لاسه ورکړي

اېلن ماسک د اېکس پیغام رسولو پلټفارم «ټوېټر» به د روان میلادي کال تر پایه د سوداګریزو اعلانونو له عوایدو څخه ۷۵ میلیونه ډالر له لاسه ورکړي.

رویټرز خبري اژانس نن «شنبه، نومبر ۲۵مه» راپور ورکړی چې اېکس به دغه عواید د یو‌شمېر سترو شرکتونو له‌خوا د سوداګریزو اعلانونو د ځنډولو له امله له لاسه ورکړي.

یادو شرکتونو تېره اوونۍ د «یهودیانو پر ضد» د اېلن ماسک د ملاتړ په غبرګون کې دې شبکه کې خپل سوداګریز اعلانونه بند کړې دي.

رویټرز د نیویارک ټایمز له قوله په دې راپور کې ویلي چې څه باندې ۲۰۰ تبیغاتي شرکتونه څېړل شوي چې له ډلې یې ګڼ‌‌شمېر شرکتونو دې شبکه کې خپل تبلیغات بند کړي یا یې د بندېدو په اړه فکر کوي.

کوکا کولا، امازون، مایکروسافټ او یو‌شمېر نورو سترو شرکتونو لا له وړاندې اېکس خپل تبیغات بند کړې دي.

اېکس تراوسه په دې اړه رسنیو ته څه نه‌دي ویلي.

د راپورونو له مخې په ۲۰۲۲ کال کې هغه مهال چې اېلن ماسک ټوېټر وپېره او نوم یې اېکس ته بدل کړ، دې شبکې ته اعلان ورکوونکي شرکتونه کم شوي دي.

همداراز اېکس کې له کرکې ډکې او پارونکې منځ‌پانګې ډېرې شوي او دغه چاره د اېکس منځ‌پانګه کې د څار او توازن کمښت له امله بلل کېږي.

له دې وړاندې رویټرز راپور ورکړی و چې د اېلن ماسک له پېر وروسته اېکس د تېر کال په پرتله هره میاشت ۵۵سلنه عواید له لاسه ورکړي دي.