فېسبوک کې د ملګرتیا لېږنې ځینې اصول او اداب

۱- که مو پروفایل باندې خپل انځور نه وي، چا ته بلنه مه لېږئ، ځکه د مجهول الهویته او نامالوم شخص بلنه څوک نه مني
۲- کله چې چا ته بلنه لېږئ او په عین حال کې مسیج کې هیله ترې کوئ، چې بلنه مو ومني، نو د (هیلې) په انداز غوښتنه ترې وکړئ، لکه: ښاغلیه! هیله ده، بلنه مې ومنئ!
په آمرانه او استادانه لهجه مه ورته وایاست: بلنه واخله!
۳- فېسبوک کې د ملګرو د شمېر محدودیت دی، تر (۵۰۰۰) زیات کسان څوک ملګري کولای نه شي، نو که ستا بلنه چا ونه منله، یا یې په ځنډ ومنله، پر هغه د مغروره او کبرجن ګومان مه کوه، مه دا ورته وایه، بلنه منې، که یې بیرته واخلم!
۴- مه دا وایه، که چا زما بلنه ۲۴ ساعته کې ونه منله، بیرته یې کېنسلوم، ته او ستا بلنه دومره مهم نه دي، چې خلک وګواښې
۵- هېڅکله یو چا ته له دې امله بلنه مه لېږه، چې خپل یو لایکر زیات کړې او هغه به ستا پوسټونه لایکوي، مهمه دا ده، چې د هغه ذوق او علمي سویه وګورې، چې څه ډول مطالب خپروي، چې یو څه ترې زده یا ورزده کړې
٦- د نجلۍ په نامه اکونټ ته د عاشقۍ لپاره بلنه مه لېږه! نجونې وزګارې نه دي، چې له هر للو و پنجو سره د مینې تار وغځوي، مېرمنې او نجونې هم موږ غوندې دلته راځي، چې یو څه ولیکي، ځینې مطالب خپاره کړي او یو څه زده کړي، د عاشقۍ او عیاشۍ لپاره نه راځي
۷- کله چې خپله بلنه له هرې وجې بیرته اخلئ، نو جار مه وهئ او مه هغه شخص ته وایاست، په پټه خوله یې کېنسل کړئ، ځکه دلته د ملګرو کمی نشته، هر چا ته په سلګونو او زرګونو بلنې پرتې دي
۸- کله چې مو څوک بلنه ومني، سمدستي مسینجر کې شخصي پوښتنې مه ترې کوئ، د فېسبوک ملګرتیا تر همدې لایک او کمینټ پورې محدوده ده، دا چې هغه ځوک دی، څه کوي او چیرې اوسي، د هغه په اړه پلټنه مه کوه
۹- د یو چا د کورنۍ ښځینه غړو ته بلنه مه لېږه، ځکه هغوی اکثره یوازې د خپلې کورنۍ او نږدې دوستانو بلنې مني
۱۰- فېسبوک کې خلکو ته له دې امله بلنې مه لېږه، چې ملګري به دې زیات شي، مشهوره به شې، لایکونه او کمینټونه به دې زیات شي، فېسبوک یوه ټولنیزه شبکه ده، موږ تاسې دلته یو ګړی راځو، چې سات تېرو، له یو بل سره خواله وکړو او يو څه زده کړو، نور نو د فېسبوک شهرت، لایکونه او کمینټونه دومره مهم نه دي، چې سړی دې یې د ژوند مقصد وګرځوي
۱۱- که چا د ملګرتیا بلنه درته راولېږله، د مغرورۍ او برترۍ احساس مه کوه! مه پر هغه د بلنې منلو احسان باروه! دا فېسبوک کې یو معمول دی، ټول خلک یو بل ته بلنې لېږي، ځکه ورته خواله رسنۍ وایي، دې کې یو پر بل د احسان خبره نشته.