سياست يوازي د واک په سر مبارزه نه ده

سياست يوازي د واک په سر مبارزه نه ده، سياست يوازي د گټو په سر مبارزه هم نه ده، سياست تر هر څه د مخه د ارزښتونو او د هغوې د انتخاب په سر مبارزه ده. په هره ټولنه کي د ارزښتونو په سر سخته او هميشنې مبارزه روانه ده او دا د ارزښتونو د مخامختيا او د هغوې د انتخاب کولو مسله ده. په ټولنه کي هر وخت ددې څېړنه او ارزونه په کار دی چي ټولنه د پرمختگ او ودې په لور په کومو آرزښتونو تکيه کولاي شي او هغه آرزښتونه کوم دي چي يو ثبات لرونکی سياسي سيستم ورباندي تکيه وکړې. هغه آرزښتونه کوم دي چي بدلون منونکي دي او د ژوند کولو وړتيا لري او هغه آرزښتونه کوم دي چي بې باوره شوي او د راتلونکي په لور د ټولنې په لارښوونه کي پاتې راغلې دي. يو ثبات لرونکی سياسي سیستم د يوه سړی په واکمني نه جوړيږي. ددي ډول سيستم د جوړیدولو ارزښت جمعي اراده دي.
د انسانانو تر منځ اړيکې ټولنیزې اړيکې دي او دا اړيکې تنظيم کولو ته ضرورت لري او هغه څه چي دا اړيکې تنظيم کوي ارزښتونه دي. موږ د عادت له مخې د هغه څه په هکله خبرې کوو او هغه څه ښه بيانو چي فزيکې او ساده ځانگړتياوی ولرې او خوښېږې مو چي پيچېلې ټولنېزې چارې هم د هغوې په معيار وسنجو، خوکله چي په ارزښتونو او نورمونو د خبرو کولو ضرورت منځ ته راځې يا بې وسې ښيو او يا را باندي غصه او عصبانيت غلبه کوي. خو د ټولنې د راتلونکي انتخاب د ارزښتونو په انتخاب کي دی او موږ نه يوازي اړ يو چي په ارزښتونو خبرې وکړو، بلکې د هغوې په هکله ديالوگ او بحث را پورته کړو او د هغوې تر منځ انتخاب وکړو. سره ددي چي په ټولنه کي د دا ډول بحثونو دود نشته او یا په کلکه کمزوری دی. خو اوس هغه وخت راغلی چي روشنفکران دا کار تر سره کړي. په ښه توگه ددې کار تر سره کول له يوې خوا د پرون له زندان راوتل ، له زړو عادتونواو څو ځله ناکامو دگمونو ځان وژغورل او له بلې خوا په خپل کار کي د پوهي او عقل پیروي دی.
دواړه چپ او ښی لوري په دي پوهېږې چي دروغجنوتوتالیتر ايديولوژيو او کاپې شويو فکرونو ټولنه له څومرو لويو غمېزو سره مخامخ کړي ، خو تر اوسه ددې شهامت ډېر کم دی چي په بنيادي توگه له دغو ايديولوژیو او فکرونو سره پریکړه وشي.
په سياسي برخه کي ارزښتونه په سياست کي د ټولو ګډون او سياسي پلورالیزم دي.
د ملت جوړولو په کارکي هغه ارزښتونو مرسته کوي چي په ويشونکو عنصرونو غلبه وکړي. په ملت کي اساسي ارزښت د فرد ازادي او افرادو برابري دی.
د فکرونو برخه کي په خپله فکر کول او د فکرونو خپلواکې دي. د هر چا خوښېږې په خپله فکر وکړي، خپلواک شخصيت ولري په خپله ددې پوهه ترلاسه کړې چي د ښو او بدو تمېز وکړې او له نورو سره په برابري کي د ټولنې اوسياست په کار کي گډون وکړې.