جوزجان کې داعشیانو کم‌عمره ماشومان نکاح کړي

د جوزجان درزاب ولسوالۍ یو ۱۴ کلن ماشوم او د قربانیانو کورنۍ وايي، د داعشیانو قوماندانان له کم‌عمره ماشومانو سره په زوره ودونه کوي.

د دوی په وینا، یادې ډلې ورسره له  تېرو دوو کلونو راهیسې هر ډول جنایت کړی او باید په دار وځړول شي.

تر هغې وروسته – چې جوزجان کې د داعیشانو رهبر او ۲ سوه جنګیالي حکومت ته تسلیم شول ـ د جوزجان د ځېنو ولسواليو اوسېدونکي یې د اعتراض په توګه پر وړاندې راپورته شوي‌دي.

د درزاب ولسوالۍ یو شمېر ماشومان او د قربانیانو د کورنیو غړي د یادې ډلې له لوري پر دوی د شویو ظلمونو ترڅنګ، د ماشومانو جنسي تېري نه هم پرده پورته کوي.

دغه ماشومان وايي، داعشیانو په زوره بیولي او ترنکاح وروسته یې ورباندې جنسي تیری کړیدی.

عبدالله د یوه ۱۴ کلن ماشوم مستعار نوم دی چې د داعشیانو یو قوماندان نکاح کړی او څو ځلې یې پرې جنسي تېری هم کړی دی.

دغه ماشوم وايي، یادې ډلې د درزاب ولسوالۍ په ګډون له څوو نورو ولایتونو شاوخوا ۵۰ ماشومان راټول او خپلو قوماندانانو ته یې نکاح کړي چې هر یوه ته یې درې ـ درې ماشومان رسېدلي دي.

د عبدالله په وینا، له خپلې کورنۍ ناخبره دی. داعشیانو ورسره نکاح کړې او پر وهلو او ډبولو سربېره د جنسي تېري قربانی شوی هم دی.

په همدې حال کې د درزاب اوسېدونکي او د قربانیانو کورنۍ غړي وايي، داعشیانو یې پر مال، کور او ناموس تېری کړی، لورګانې، زامن او د خپلوانو ماشومانو یې ترې بیولي او په زوره نکاح کړي‌دي.

دوی له حکومته هغو داعشیانو ته د سزا غوښتنه کوي چې د طالبانو له وېرې ورته تسلیم شوي؛ ګنې په راتلونکي کې به د نورو هېوادوالو ژوند هم وګواښي.

د جوزجان درزاب ولسوالۍ اوسيدونکي اوغلشا او عبدالواحد وايي، داعش‌یانو د دوی له سیمو – چې نږدې خپلوان یې هم په‌کې دي – ۷ کلن، ۸ کلن، ۱۵ کلن او ۱۸ کلن ماشومان او تنکي ځوانان په زوره بیولي او نکاح کړي‌دي.

بله‌خوا د جوزجان امنیې قوماندانۍ د امنیت آمر عبدالحفیظ خاشې هم مني چې داعشیانو په درزاب او قوش‌تېپې ولسوالیو کې پر خلکو ظلمونه کړي‌دي.

خو جوزجان کې د داعش‌یانو مشر حبیب‌الرحمان – چې تازه له خپلو ملګرو سره دولت ته تسلیم شوی ـ د درزاب ولسوالۍ د اوسېدونکیو ادعاوې ردوي او له حکومته غواړي چې پر وړاندې یې د روانو توطیو مخه ونیسي.

سلام وطندار