د افغانستان د مقدس جهاد په هکله د یو لړ څرګندونو په اړه مطبوعاتي اعلامیه

ارګ، کابل: زموږ پر ګران هېواد د پخواني شوروي اتحاد له یرغل وروسته، افغانانو د یو ملي پاڅون په نتیجه کې د خپلې مقدسې خاورې د خپلواکۍ په خاطر جهاد پيل کړ. 
د پخواني شوروي اتحاد پر ضد د افغانانو د مقدس جهاد د اعلان په طرفدارۍ او د دغه یرغل د غندلو په هکله نړۍ بشپړه اجماع درلوده، د ملګرو ملتونو سازمان عمومي غونډې په لوړ اکثریت پر افغانستان د پخواني شوروي اتحاد د پوځي یرغل په ضد یو اعتراضیه پرېکړه لیک صادر کړ او دغه یرغل یې وغانده. 
همدارنګه د ۳۴اسلامي هېوادونو د بهرنیو چارو وزیرانو یوه ګډه بیانیه ورکړه چې پخوانی شوروي اتحاد په کې مقصر ګڼل شوی و او له قید و شرط پرته یې ژر تر ژره له افغانستان څخه د سرو لښکرو پر وتلو ټینګار کړی و. 
د پخواني شوروي اتحاد له یرغل څخه وروسته د امریکا د متحدو ایالتونو ټولو جمهور رئیسانو نه یوازې دا چې دغه یرغل غندلی؛ بلکې دوی د افغانانو د مقدس جهاد ملاتړي پاتې شوي دي.
د جهاد په دوران کې افغانانو انتحاري بریدونه، نه کول او نورو هېوادونو ته یې هیڅ ګواښ نه و متوجه کړی.
په دې حساس تاریخي پړاوو کې نړۍ له ابهاماتو څخه ډکه ده، همدارنګه نړۍ د بدلون په حال کې ده او د بدلون او ابهام په دغه چوکاټ کې اکثره هېوادونه په ټولو برخو کې له سره خپلې نوې محاسبې کوي.
له نورې نړۍ سره زموږ اړیکې د مشترکو ګټو په اساس تدوین شوي دي، په افغانستان کې نړیوالې قواوې یوازې د افغانستان لپاره نه؛ بلکې د نړۍ او د همدغه دوستو هېوادونو د امنیت لپاره پرتې دي.
د ملي وحدت حکومت له پيل څخه تر اوسه افغانانو خصوصاً زموږ اتلو امنیتي او دفاعي ځواکونو د هېواد د بقا او د خپلو خلکو د هوساینې لپاره په لسهاو زره قربانۍ ورکړي دي، هر هېواد ته خپلې ګټې مهمې دي او د هېواد په دغه حساسو شرایطو کې زموږ لومړیتوب دا دی چې له هره اړخه په خپل ځان اتکا زیاته کړو.
د څرګندونو او د یو هېواد د رسمۍ پالیسۍ ترمنځ توپير موجود وي، نو ځکه موږ د یو لړ څرګندونو په هکله د امریکې د متحدو ایالتونو د دوست هېواد له حکومت څخه د دیپلوماتیکو لارو د یو شمېر پالیسیو په اړه وضاحت غوښتی دی او تمه لرو چې په نږدې راتلونکي کې له موږ سره شریک شي.