د پښتون ژغورنې غورځنگ د نیول شویو مشرانو وکیل شهاب خټک ویلي دي چې امنیتي ځواکونو د قامي اسمبلۍ په غړي علي وزیر باندې تشدد کړی او پر بدن یې، له سره تر پښو پورې، د تشدد نښې پاته دي.
شهاب خټک دا خبره واضحه کړه چې علي وزیر ورته ویلي، دا تشدد پر ده په جېل کې نه، بلکې د خړ کمر د پیښې وروسته، د گرفتارۍ پر وخت شوی دی.
د مئې پر ٢٦مه، د خړ کمر پیښې وروسته، علي وزیر د پاکستان پوځ پخپلې ولکې کې اخیستی و.
پوځ د خړ کمر له واقعې وروسته په یو بیان کې وویل چې د محسن داوړ اؤ علي وزیر په مشرۍ یو شمیر خلکو “د ترهګرو د خلاصولو دپاره” د پوځ پر یوې پوستې “برید وکړ” چې پکې پینځه عسکر ژوبل شول.
پوځ په علي وزیر د تشدد په اړه خپل دریځ نه دی څرگند کړی او د پېښور د جېل چارواکو واېس اف امریکه سره د خبرو په وخت دا خبرونه رد کړي دي چې گنې د پي ټي ایم په مشرانو په جېل کې دننه تشدد کیږي. هغوی وایس آف امریکه اردو څانگې ته ویلي، په دوی هېڅ قسمه تشدد ندی شوی او “ښه خیال یې ساتل کیږي.”
د پي ټي اېم د قانوني چارو د کمېټۍ مشر شهاب خټک وي او ای ډیوه سره د ځانگړو خبرو په وخت ویلي دي چې د پېښور په مرکزي بندي خانه کې ېی د غورځنگ دوه مخکښو مشرانو علي وزیر او محسن داوړو سره لیدلي او په قانوني چارو یې ورسره خبرې کړي دي.
شهاب خټک د علي وزیر له قوله وایي چې کله فوج د تېرې میاشتې په ٢٦ مه نېټه په شمالي وزیرستان خړ کمر سیمه کې هغه ونیولو نو په ده ېی د لوړو (سوټیو) په ذریعه ډېر بد تشدد کړی دی.
شهاب خټک وايي چې د محسن داوړ په لاس ېی هم زخم لیدلی دی او دغه زخم هغه وخت جوړ شوې وو کله چې پوځي عسکرو په خړ کمر سیمه کې د پي ټي ایم په پلویانو رسا ډزې کړې وې چې په نتیجه کې ېی د پي ټي اېم د بیان ترمخه، ١٣ فعالان مړه شوي وو او په لسگونو نور ژوبل شوي وو. د پاکستان پوځ، د دیارلسو کسانو د وژل کیدو پخلی نه دی کړی، او په بیان کې یې یوازې ویلي و چې په پیښه کې درې کسان وژل شوي، او په سبا یې سیمې ته نږدې له کندو څخه پنځه مړي هم موندلي دي.
د جېل چارواکو ویلي دي چې د ډپټي کمشنر د اجازت نه بغېر، له علي وزیر او محسن داوړ سره په ملاقات کولو بندېز لگولی شوی دی.
د پي ټي اېم د قانوي مرستو د کمېټۍ مشر شهاب خټک غوښتنه کړې ده چې حکومت دې خړکمر سیمې د پېښې بې پلوه پلټنې وکړي.
د پېښې وروسته د بشري حقونو د څار نړېوال تنظیم یا هیومن رایټس واچ، د پاکستان پر چارواکو غږ کړی چې د شمالي وزیرستان په خړکمر سیمه کې دې د مئې د ٢٦مې نیټې د پېښې په بی طرفه ډول پلټنې وکړی شي.
د دې پېښې وروسته د غور ځنگ د مشر منظور پښتین په غږ په پاکستان او گرده نړۍ کې د غورځنگ پلویانو احتجاجونه کړي وو.
پېښور کې ځايي پولیسو په حیات اباد سیمه کې په احتجاج ناستو د پي ټي اېم په فعالانو د روژې په میاشت کې تشدد کړې وو او یوشمېر ېی بیا نیولي هم وو.
د انساني حقونو نړیوالې ادارې اېمنسټي انټرنېشنل ددې وروسته په یو بیان کې ویلي وو په پېښور کې د پښتون ژغورنې غورځنگ په احتجاجي ناسته د پولیس “حمله” د غندنې وړ ده.
اېمنسټي انټرنېشنل په ټوېټر وویلي وو چې په حیات آباد کې د روژه ماتي په وخت په پرامنه احتجاج کونکو د پولیس حمله اندېښمنه خبره ده.
ادارې وویلي دي “د نړیوال قانون دلاندې د طاقت بې ځایه استعمال منع دی او دا پېښه دې بغیر د څه ځنډ وڅېړلی شي.”
د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه
د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :
Support Dawat Media Center
If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320
